Argjentina e udhëhequr nga Leo Messi ka zhvilluar një paraqitje fantastike ndaj Kroacisë, duke fituar në shifrat 3-0 dhe duke siguruar kështu një biletë në finalen e Kupës së Botës. Argjentinasit nuk e diskutuan asnjëherë superioritetin në fushën e blertë dhe përpjekjet e tyre për gol u shpërblyen shumë shpejt.
Në minutën e 34’ të takimit arbitri akordoi një penallti në favor të Argjentinës, pas ndërhyrjes të gabuar në zonë të portierit Livakovic. Nga pika e bardhë e penalltisë Messi nuk kishte si të gabonte. “Pleshti” kaloi në avantazh të tijët me një goditje të fortë dhe të sigurtë. Vetëm 5 minuta më vonë, Kroacia u kap përsëri e papërgatitur, teksa insistimi i Julian Alvarez u shpërblye me gol në minutën e 39’.
Pjesa e parë e takimit u mbyll me avantazhin e dyfishtë të argjentinasve, dhe kjo i ofroi atyre më shumë qetësi në pjesën e dytë të lojës. Kroacia nga ana tjetër nuk zbriti me ide të reja pas pushimit, teksa u pa qartë se ekipit i mungonte kreativiteti në fazën sulmuese. Përkundrazi, ishte përsëri Argjentina që pati rastet më konkrete për shënim.
Pas një vrapimi fantastik individual të Leo Messi, numri 10 pasoi topin në zonën kundërshtare për Julian Alvarez, i cili shënoi golin e tretë për Argjentinën, duke vulosur kështu përfundimisht shifrat e takimit. Në përfundim të ndeshjes atmosfera në Lusail Stadium ishte fantastike dhe argjentinasit festuan me fansat e tyre që kishin okupuar pjesën më të madhe të stadiumit.
Rezultati do të thotë se Argjentina do të luajë finalen e madhe përballë fituesit të sfidës Marok – Francë. “Gjelat” janë favoritë për të siguruar kualifikimin, por Markou ka dëshmuar disa herë në këtë botëror se di të surprizojë. Për këtë arsye, pritet një tjetër takim spektakolar në Katar.
