Anglia nuk shkoi më shumë se barazimi në përballjen me USA, duke humbur kështu shansin për të vulosur çështjen e kualifikimit në grupin B. Takimi shkoi shumë ndryshe nga çfarë ishte parashikuar, teksa për një pjesë të madhe të lojës ishte në fakt USA, ajo që dominoi sfidën, duke kërkuar golin e fitores.
Nga ana tjetër, “3 Luanët” nuk krijuan asnjëherë asgjë të veçantë, teksa paraqitja nuk i afrohej aspak asaj ndaj Iranit në ndeshjen hapëse. Mason Mount detyroi portierin e USA, Matt Turner të bënte një pritje spektakolare në pjesën e parë, por ky ishte pak a shumë i vetmi rast i pastër i anglezëve në 45 minutat e para. Në të dytën Anglia gjithashtu u shfaq e vakët, teksa goditja me kokë e Harry Kane ishte i vetmi rast i rrezikshëm.
USA nga ana tjetër pati raste shumë më të pastra për gol, teksa Weston McKennie humbi një mundësi të mirë për të kaluar të tijët në avantazh, ndërkohë që Christian Pulisic goditi traun e portës në pjesën e parë. Ky është një rezultat mjaft i kënaqshëm për amerikanët, të cilët janë ende në lojë për t’u kualifikuar, dhe gjithçka do të varet nga sfida me Iranin. Anglia nga ana tjetër gjithashtu është shumë pranë kualifikimit, teksa i duhet vetëm të shmangë një humbje me më shumë se 4 gola përballë Uellsit.
Në përfundim të sfidës me USA, trajneri i Anglisë, Gareth Southgate, u shfaq i lumtur me mentalitetin e ekipit të tij, pavarësisht rezultatit. Tekniku u shpreh për mediat:
“Lojtarët janë pak të dekurajuar, por unë nuk jam, nuk jam i pakënaqur. Kjo është një lojë që mund ta humbasësh nëse nuk ke mentalitetin e duhur. Të vish nga një fitore aq e kollajtë (ndaj Iranit) është e vështirë të gjesh përsëri atë nivel loje… Nuk jam i frustruar. Duhej të tregonim një tjetër anë tonën sot dhe jam i lumtur me mentalitetin e skuadrës.”
