Argjentina mposhti Australinë me rezultatin 2-1, duke siguruar kështu kualifikimin në fazën e ardhshme të Kupës së Botës. Leo Messi ishte dhe një herë tjetër protagonist kryesor i kampionëve të Copa America, teksa ia doli të gjejë përsëri rrugën e rrjetës, në ndeshjen e tij numër 1000 në karrierë.
Kombëtarja argjentinase nuk krijoi shumë shanse për gol në pjesën e parë, kjo dhe falë mbrojtjes dhe rreshtimit mjaft solid të australianëve. Gjithsesi, në të vetmin rast konkret për gol, ishte Messi që në minutën e 35’ të sfidës zhbllokoi rezultatin me një goditje mjaft të bukur me të majtën. Pjesa e parë e takimit u mbyll me avantazhin 1-0 të amerikano-latinëve.
Në të dytën Argjentina gjeti përsëri rrjetën, kësaj rradhe me Julian Alvarez në minutën e 57’. Sulmuesi ndëshkoi gabimin e portierit Mat Ryan i cili u tregua i pakujdesshëm duke i dhuruar topin kundërshtarit. Por pavarësisht golit të dytë, Australia nuk u demotivua dhe arriti të shënojë me Craig Goodwin në minutën e 77’. Goditja e këtij të fundit pësoi një devijim deçiziv nga Enzo Fernandez. Goli ringjalli shpresat e australianëve, por për fatin e mirë të Argjentinës, shifrat nuk ndryshuan deri në fund të sfidës.
Ndërkohë në ndeshjen tjetër, Hollanda ia doli të mposhtë USA me rezultatin bindës 3-1. “Tulipanët” bënë detyrën duke mos vënë asnjëherë në diskutim kualifikimin, pavarësisht këmbënguljes së kundërshtarit. Të besuarit e trajnerit Van Gaal shënuan në minutën e 10’ të sfidës me Depay, pas një aksioni model ku hollandezët kompletuan 21 pasa përpara se të gjenin rrugën e rrjetës. Pak para fundit të pjesës së parë Hollanda dyfishoi avantazhin me Blind, pas një aksioni të ngjashëm me atë të golit të parë.
Në minutën e 76’ Wright rihapi sfidën me një gol të papritur, por shpresat e USA u shuan pas vetëm 5 minutash. Dumfries shënoi golin e tretë për hollandezët, duke vulosur kështu rezultatin përfundimtar 3-1, si dhe kualifikimin në fazën e ardhshme për “tulipanët”.
