Australia është kualifikuar në fazën me eleminim direkt të Kupës së Botës, për herë të parë pas 16 vitesh. Australianët ia dolën të sigurojnë një fitore minimale 1-0 përballë Danimarkës, pavarësisht se këta të fundit dominuan pjesën më të madhe të lojës.
Danezët humbën topin në zonën kundërshtare, dhe Australia shfrytëzoi në mënyrë perfekte një kundërsulm për të shënuar golin e vetëm të sfidës në minutën e 60’ të sfidës me anë të Mathew Leckie. Ky i fundit mposhti portierin Kasper Schmeichel me një goditje të ulët. Rezultati do të thotë se Australia mblli grupin D në vendin e dytë me 6 pikë, po aq sa Franca kryesuese, por këta të fundit u kualifikuan si të parët për shkak të golavarazhit më të mirë.
Danimarka nga ana tjetër largohet kështu nga kompeticioni me vetëm 1 pikë të grumbulluar në 3 paraqitje. Trajneri Kasper Hjulmand u shfaq i vetëdijshëm për problemet në sulm të ekipit të tij, teksa kreu 3 zëvëndësime nga ndeshja paraardhëse me Francën. Martin Braithwaite, Mathias Jensen dhe Andreas Skov Olsen ishin titullarët përballë Australisë, por ndryshimet e teknikut Hjulmand nuk bënë një diferencë të madhe në fushën e blertë. Danezët pretenduan për një penallti në pjesën e dytë të lojës, kur Kasper Dolberg u rrëzua në zonën kundërshtare, por lojtari ishte në një pozicion jashtë loje gjatë ndërtimit të aksionit.
Australia ia doli të rikuperonte disfatën e thellë 4-1 ndaj Francës, duke siguruar fitore ndaj Tunizisë dhe Danimarkës, që rezultuan kështu deçizive përsa i përket kalimit në fazën e ardhshme.
Ndërkohë paralelisht në grupin C, Argjentina siguroi kualifikimin duke mposhtur Poloninë me rezultatin e pastër 2-0. Gjithsesi, polakët gjithashtu siguruan kualifikimin, duke qënë se ndanë të njejtin numër pikësh me Meksikën në grup, por golavarazh më të mirë. Meksikanët fituan 2-1 përballë Arabisë Saudite por rezultati nuk ishte i mjaftueshëm për të siguruar kalimin në fazën e mëtejshme.
