Kroacia ia doli të sigurojë kualifikimin në çerek-finalet e botërorit, vetëm pas ruletës së penalltive përballë Japonisë. Koha e rregullt e takimit u mbyll me rezultatin 1-1, teksa ishte Japonia ajo që u shfaq më insistuese në fushën e blertë, përgjatë pjesës më të madhe të sfidës.
Japonezët kaluan në avantazh në minutën e 43’ të ndeshjes me anë të Maeda, i cili shfrytëzoi mjaft mirë konfuzionin e momentit në mbrojtjen kroate. Pjesa e parë e takimit u mbyll me avantazhin e aziatikëve, por në të dytën Kroacia rriti dukshëm tempin e lojës në kërkim të golit të barazimit. Ky i fundit do të vinte shumë shpejt, vetëm 10 minuta pas startit të pjesës së dyte. Ishte Ivan Perisic që shfrytëzoi në mënyrë perfekte krosimin e Dejan Lovren, duke dërguar topin në rrjetë, me një goditje të bukur me kokë.
Koha e rregullt u mbyll në barazim 1-1, por as 30 minutat shtesë nuk arritën të prodhojnë diçka të re në Al Janoub Stadium. Për këtë arsye, ekipet iu drejtuan pikës së bardhë të 11-metërshit. Në këtë moment, kroatët iu falën portierit Livakovic, i cili në mënyrë spektakolare ndali penalltitë e Takumi Minamino, Kaoru Mitoma dhe Yoshida. Kroacia triumfoi në fund 3-1 nga pika e bardhë, duke arritur kështu dhe një herë tjetër çerek-finalet e botërorit.
Ndërkohë nga ana tjetër, Brazili shkatërroi Korenë e Jugut me rezultatin 4-1, duke mos vënë asnjëherë në dyshim kualifikimin. Përtej golave, diferenca ishte e qartë në fushën e blertë, teksa brazilianët nuk hasën asnjëherë vështirësi serioze për të vënë në vështirësi mbrojtjen koreane. Goli i parë do të vinte në minutën e 7’ me autor superstarin e Real Madrid, Vinícius Júnior. Vetëm 4 minuta më vonë arbitri akordoi një penallti në favor të brazilianëve e cila u konvertua lehtësisht në gol nga Neymar. 2 golat e tjerë për Brazilin u shënuan nga Richarlison dhe Lucas Paquetá, po në pjesën e parë.
Në të dytën brazilianët ngadalësuan disi tempin e lojës, nisur dhe nga rezultati mjaft komod. Koreja ndërkohë gjeti golin e ngushëllimit në minutën e 76’, kur Paik Seung-ho shënoi me një goditje spektakolare. Gjithsesi, ky ishte fundi i aventurës së koreanëve në Katar.