Maroku ka prodhuar një tjetër surprizë në këtë botëror, teksa ka arritur të mposhtë Belgjikën me rezultatin 2-0 në grupin F. Marokenët shënuan 2 gola në minutat e fundit të sfidës, me anë të Abdelhamid Sabiri dhe Zakaria Aboukhlal.
Portieri Thibaut Courtois kishte përgjegjësinë kryesore në pësimin e golit të parë, teksa nuk bëri asnjë përpjekje për të ndalur goditjen standarte të Sabri, në minutën e 73’ të ndeshjes. Në përpjekje për të gjetur golin e barazimit Belgjika la shumë hapësira në prapavijë, dhe u ndëshkua për herë të dytë, kësaj rradhe me anë të Aboukhlal në minutën e 92’. Gjithçka erdhi si produkt i insistimit të Ziyech, i cili pasi rrëmbeu topin asistoi në mënyrë perfekte shokun e tij të skuadrës.
Belgjika pagoi çmimin për një performancë jo në nivelin e pritshëm prej tyre. Të besuarit e Roberto Martinez dominuan pjesën më të madhe të lojës, por dështuan të krijonin shanse konkrete për shënim. Rezultati 2-0 do të thotë se Maroku kryeson tashmë grupin F me 4 pikë, ndërkohë që Belgjika mban vendin e dytë me 3 pikë.
Në fillim të takimit u duk se Maroku nuk do t’i mbijetonte dot presionit të Belgjikës, por marokenët shfrytëzuan mjaft mirë kundërsulmin për të rrezikuar portën e Courtois. Të besuarit e trajnerit Martinez nuk shfaqën shenja përmirësimi as në pjesën e dytë, teksa goditjet nga distanca të Eden Hazard dhe Dries Mertens ishin të pasuksesshme. Tekniku komentoi paraqitjen e të tijëve në përfundim të takimit:
“Kjo (humbja) ka të bëjë me mentalitetin, nuk mendoj së është mungesë kualiteti. Luajtëm me topin shumë më mire sesa përballë Kanadasë, dhe u vendosëm në pozicione shumë të mira, por më pas pasimi i rradhës mungonte…Nuk mund të gjenim lojtarin e fundit pasi mendoj se po luanim me frikë nga humbja…”
