Marcus Rashford dhe Jude Bellingham janë grumbulluar sërisht nga trajneri Southgate, për Kualifikueset e Botërorit të Katarit 2022. “3 Luanët” do të përmbyllin kualifikueset e tyre me takimet finale përballë Shqipërisë dhe San Marinos.
Ndërkohë duket se Southgate ka lënë jashtë skuadrës Jadon Sancho, dhe shokun e tij të skuadrës tek Manchester United, Jesse Lingard. Anglia do të përballet me Shqipërinë në Wembley, në datë 12 Nëntor.
Më pas, të besuarit e Southgate do të udhëtojnë drejt San Marinos. Të dyja takimet duken të lehta për anglezët, të cilët ndodhen në krye të grupit I me 20 pikë. Gjithsesi, Gareth do të duhet të bëjë kujdes, pasi Polonia e vendit të dytë ka vetëm 3 pikë më pak. Matematikisht, Anglisë i duhen 4 pikë, nga 2 ndeshjet e fundit për të siguruar një vend në Botërorin 2022.
Një tjetër lojtar me mjaft peshë që rikthehet në kombëtare është mbrojtësi i Liverpool, Trent Alexander-Arnold. Ky i fundit luajti në mënyrë të shkëlqyer në fitoren që ekipi i tij arriti përballë Atletico Madrid në Champions League. Hera e fundit që Arnold u aktivizua me kombëtaren angleze ishte në 5 shtator. Grumbullimi i tij është një shenjë se Gareth Southgate, e di se mbrojtja e tij duhet të japë më të mirën në këto 2 sfida.
Ndërkohë Rashford nuk ka luajtur për “3 Luanët”, që prej finales së Euro 2020, ku Italia arriti t’i rrëmbente anglezëve titullin kampion. Përsa i përket mungesës së Lingard dhe Sancho, kjo mendohet të ketë ardhur si pasojë e formës jo-konsistente që futbollistët kanë shfaqur me klubin e tyre. Mos-aktivizimi i rregullt gjithashtu ka patur ndikimin e vet tek vendimi i Southgate.
Më poshtë është renditja e plotë e të grumbulluarëve të përfaqësueses angleze, për këtë fushatë kualifikuesesh:
Portierë: Sam Johnstone, Jordan Pickford, Aaron Ramsdale
Mbrojtës: Trent Alexander-Arnold, Ben Chilwell, Conor Coady, Reece James, Harry Maguire, Tyrone Mings, Luke Shaw, John Stones, Kyle Walker
Mesfushorë: Jude Bellingham, Jordan Henderson, Mason Mount, Kalvin Phillips, Declan Rice, James Ward-Prowse
Sulmues: Tammy Abraham, Phil Foden, Jack Grealish, Harry Kane, Marcus Rashford, Bukayo Saka, Raheem Sterling