Kylian Mbappe thuhet se ka firmosur tashmë një kontratë afatgjatë me Real Madrid, duke nisur nga sezoni i ardhshëm. Lajmi është publikuar nga media prestigjoze spanjolle Marca, sipas të cilës, sulmuesi francez do të jetë pjesë e galaktikëve për 5 vitet e ardhshme. Pas telenovelës së vitit 2022, ku Mbappe hoqi dorë në momentin e fundit nga transferimi tek Real, kësaj rradhe të dyja palët janë të sigurta, dhe janë kujdesur që gjithcka të shkojë si duhet.
Mbappe do të jetë lojtari më i paguar tek “Los Blancos”, por megjithatë, paga e francezit do të jetë më e ulët sesa propozimi i Real në vitin 2022. Kjo ka ardhur specifikisht me kërkesë të presidentit Florentino Perez, i cili ka kërkuar që paga e Mbappe të mos prishë strukturën e pagave të lojtarëve aktualë të Real Madrid. Sipas burimeve jo zyrtare, francezi pritet të përfitojë rreth 15-20 milionë euro neto në sezon. Ndërkohë, klubi dhe sulmuesi gjithshtu kanë rënë dakord mbi të drejtat e imazhit, pas disa mosmarrëveshjeve fillestare.
Mbappe dhe agjentët e tij kanë rënë dakord me paketën e kufizuar financiare, pasi kjo është e vetmja mënyrë që sulmuesi të realizonte ëndrrën e tij për të luajtur me Real Madrid. Megjithatë, marrëdhënia e mirë mes lojtarit dhe presidentit Florentino Perez gjithashtu ka ndikuar për mirë në arritjen e një akordi mes palëve. Perez u shpreh i zhgënjyer nga Mbappe në vitin 2022, kur francezi u tërhoq nga marrëveshja në momentin e fundit, por duket se dyshja ka ruajtur kontaktin e mirë pavarësisht të kaluarës.
Prezantimi i Mbappe në Bernabeu pritet të ndodhë në korrik, muaj gjatë të cilit do të inagurohen zyrtarisht dhe punimet e reja në stadiumin legjendar të Real Madrid. Mbetet të presim momentin e konfirmimit të lajmit nga vet klubi, por kjo nuk pritet të ndodhë deri në qershor.
