Sipas raportimeve, Kylian Mbappe është i nervozuar me Olivier Giroud, pas komenteve të këtij të fundit, i cili u ankua se nuk po merrte pasime nga shokët e tij të skuadrës te Franca. “Gjelat” vulosën një fitore të pastër në shifrat 3-0 përballë Bullgarisë, në ndeshjen e fundit përgatitore përpara nisjes së Europianit. Por pas ndeshjes, Giroud pranoi para mediave se nuk ishte i lumtur me kohezionin e ekipit në sulm.
Sulmuesi u fut si zëvëndësues në ndeshje, dhe më pas arriti të shënonte dhe dy gola. Megjithatë ai u shpreh për L’Equipe du Soir:
“Isha pak në qetësi, sepse disa herë vrapoj në sulm, por topat nuk vijnë. Nuk po them se kam vrapimet më të mira, por jam i gatshëm që të ofroj zgjidhje kur jam brenda zonës.”
Por, sipas prestigjozes L’Equipe, Kylian Mbappe është ndier “i sulmuar” dhe “i inatosur” me komentet e Giroud. Sulmuesi i Paris Saint-Germain ka dashur që të japë dhe një deklaratë për mediat, me qëllim sqarimin e situates në kampin francez. Gjithsesi, në momentin e fundit ka qenë trajneri Didier Deschamps ai që ka ndërhyrë për të sqaruar situatën. Sipas tij, komentet e Giroud nuk ishin të drejtuara drejt Mbappe. Numri 1 i pankinës franceze dha sqarimin e tij për episodin:
“Situata është gjithmonë e njejtë, sulmuesi do të thotë që problemin e ka mesfusha, ndërsa mesfushori do të thotë që fajin e ka sulmi. Ndonjëherë pasimet nuk vijnë, ndonjëherë janë të ngadalëta. Por për këtë, nuk e ka fajin Kylian dhe asnjë tjetër.”
Deschamps gjithashtu shtoi:
“Fola me Kylian në pushimin mes pjesëve. Ai e di mjaft mirë se Olivier nuk ka të njejtin profil si Karim (Benzema). Lojtarët bëjnë zgjedhjet e tyre gjatë lojës, dhe ato nuk kanë pse të interpretohen gjithmonë. Nëse ata ndërmarrin një aksion individual, në vend që të pasojnë, vendimi u takon atyre. Sidomos kur loja nuk ua imponon një gjë të tillë.”
Kujtojmë se Franca do të përballet me Gjermaninë, në ndeshjen e tyre të parë në Euro 2020.