Kylian Mbappe ende nuk e ka vendosur se ku do të luajë sezonin e ardhshëm, por duket se Premier League nuk do të jetë një alternativë në listën e francezit. Sulmuesi i premtoi mediave para disa kohësh se publiku do të merrte vesh destinacionin e tij të rradhës, përpara sfidave me eleminim direkt në Champions League. Kjo do të thotë se nëse Mbappe e mban premtimin e dhënë, lojtari do të hedhë dritë mbi të ardhmen e tij para dates 14 shkurt.
Por pavarësisht konfirmimit në pritje të francezit, alternativat janë tashmë vetëm 2. Sulmuesi do të qëndrojë tek PSG, ose do të largohet drejt Real Madrid. Burime të afërta pranë lojtarit kanë bërë me dije se superstari i PSG ka vendosur të mos marrë parasysh oferta nga kampionati anglez. Ndërkohë, në rast se Mbappe i bashkohet Real Madrid, klubi parizien e ka tashmë një emër potencial për të zëvëndësuar francezin. Bëhet fjalë për asin e Milan, Rafael Leao.
Leao sipas të gjitha gjasave do të largohet nga Milan në fund të sezonit, dhe Paris Saint-Germain ka kohë që monitoron portugezin. Pavarësisht kontratës së re që Leao nënshkroi me Milan, duket se drejtuesit e PSG nuk do të zmbrapsen për të siguruar kartonin e tij, në rast se Mbappe largohet në verë.
Vet Leao ndihet i lumtur në Milano, por sulmuesi nuk është plotësisht i kënaqur me projektin teknik të klubit. Portugezi ka tërhequr vëmendjen dhe nga klube të Premier League, specifikisht Manchester United dhe Manchester City, por klauzola prej 175 milionë eurosh për prishjen e kontratës aktuale me Milan, konsiderohet e lartë nga ana e klubeve angleze. PSG ndërkohë nuk do të ngurrojë të hidhet në sulm, pasi e konsideron Leao si zëvëndësuesin perfekt të Kylian Mbappe, për të ardhmen e klubit në planin afatgjatë.
