Sulmuesi francez i PSG, Kylian Mbappe, ka kritikuar klubin e tij në një intervistë të fundit për revistën e mirënjohur France Football. Kujtojmë se superstari i ka komunikuar klubit të tij se nuk do të firmosë një kontratë të re. Ndërkohë, kontrata e tij aktuale skadon në fund të sezonit, dhe kjo do të thotë se PSG mund të humbasë lojtarin e tyre më të vlefshëm me kosto zero. E gjithë kjo situatë ka ngjallur një debat mes Mbappe dhe drejtuesëve të klubit.
Në intervistën e fundit, lojtari e ka cilësuar PSG si një klub përçarës. Mbappe është shprehur:
“Mendoj se të luash për PSG nuk të ndihmon shumë pasi është një ekip përçarës, një klub përçarës. Ne bëmë atë që mundeshim për të fituar Champions League. Duhet të flasësh me njerëzit që e drejtojnë klubin, ata që organizojnë skuadrën, që ndërtojnë këtë klub.”
Presidenti i PSG, Nasser Al-Khelaifi, ka thënë se nuk do ta lejojë Mbappe të largohet me kosto zero në momentin kur kontrata e tij të skadojë në verë. Kjo do të thotë se sulmuesi mund të dalë në shitje shumë shpejt.
Mbappe ka fituar kampionatin francez plot 5 herë me PSG, që prej momentit kur iu bashkua klubit nga Monaco në vitin 2017. Sezonin e kaluar sulmuesi i talentuar shënoi plot 41 gola në të gjitha kompeticionet, duke ndihmuar klubin të fitojë një tjetër titull kampion në Ligue 1. Megjithatë, PSG dështoi përsëri në objektivin e saj madhor prej vitesh, fitimin e Champions League. Parizienët u mposhtën nga Bayern Munich në fazën e 1/16-ave.
Për PSG ndërkohë një epokë e re pritet të startojë këtë sezon, teksa klubi caktoi Luis Enrique si trajnerin e ri të skuadrës. Spanjolli pritet të ndërtojë një ekip të ri, duke u përqëndruar më shumë në zhvillimin e talenteve të reja.
