Barcelona nuk ka shkuar më shumë se barazimi 1-1 përballë Alaves, në ndeshjen e parë që pas shkarkimit të trajnerit Ronald Koeman. Katalanasit ishin të parët që kaluan në avantazh me Memphis Depay, i cili me një goditje të bukur me hark, dërgoi topin në rrjetë gjatë pjesës së dytë të takimit.
Por gëzimi i blaugranave do të zgjaste shumë pak. Vetëm 3 minuta më vonë, Luis Rioja i Alaves barazoi rezultatin, duke shmangur portierin Marc-Andre ter Stegen dhe duke dërguar topin në rrjetë. Ndërkohë rezultati nuk është i vetmi shqetësim për Barcelonën. Sergio Aguero la fushën, duke ngjallur shqetësim mes tifozëve katalanas të pranishëm. Argjentinasi shfaqi probleme me frymëmarrjen dhe mori menjëherë ndihmë mjekësore jashtë fushës.
Para rreth 37,000 mbështetësve në Camp Nou, skuadra e trajnerit të përkohshëm Sergi Barjuan shkoi shumë afër golit në pjesën e parë, kur goditja me kokë e Eric Garcias u prit nga portieri i Alaves, Antonio Sivera. Por pavarësisht rasteve për shënim, Barcelonës i mungoi finalizimi përpara portës.
Ndërkohë nga ana tjetër, rivalët e Real Madrid janë rikthyer përsëri te fitorja në kampionat, pas barazimit në ndeshjen paraardhëse me Osasunan. Madrilenët fituan ngushtësisht 1-2 në transfertë përballë Elche, duke siguruar një 3-pikësh mjaft të rëndësishëm në garën për titull në Spanjë.
Vinicius Junior zhbllokoi rezultatin në minutën e 22’ të pjesës së parë, duke dërguar topin në cepin e portës kundërshtare. Raul Guti i Elche u ndëshkua me karton të kuq pas një faulli të ashpër ndaj Toni Kroos. Kjo gjë vetëm sa ia bëri më të lehtë administrimin e avantazhit të besuarëve të Ancelottit.
Vinicius dyfishoi shifrat për miqtë, përpara se Elche të rikuperonte një gol me anë të Pere Milla. Gjithsesi, Real ia doli të ruajë avantazhin duke konfirmuar formën e mirë në kampionat.
