Barcelona mposhti Cadiz në shifrat e thella 4-0, në një takim që u ndërpre në minutën e 50’, për shkak të një emergjence mjekësore të një tifozi. Katalanasit kryesonin takimin 2-0 përpara se incidenti të regjistrohej. Portieri i Cadiz, Jeremias Ledesma, la portën e tij për t’i dhënë një kuti të ndihmës së shpejtë tifozëve, teksa lojtarët u shoqëruan jashtë fushës së blertë.
Trajneri i Barcelonës, Xavi, u shpreh se ishte vendimi i përbashkët i të gjithëve që loja të ndalej. Spanjolli deklaroi:
“Të gjithë pranuam të ndalojmë. Këto gjëra shkojnë përtej futbollit, këtu po flasim për një jetë njeriu. Fatmirësisht ata ia dolën ta shpëtojnë.”
Pasi loja rifilloi, Barcelona shënoi dhe 2 gola të tjerë, duke vulosur kështu një fitore të pastër. Goli i parë i katalanasve u shënua nga Frenkie de Jong, ndërkohë që Robert Lewandowski shënoi të dytin vetëm pak minuta pasi u fut në fushë si zëvëndësues. Sulmuesi polak vërtetoi edhe një herë tjetër aftësitë e tij, teksa ky ishte goli i nëntë në vetëm 6 paraqitje me Barcelonën, që prej transferimit të tij nga Bayern Munich.
Goli i tretë u shënua nga Ansu Fati në minutën e 86’, i cili gjithashtu zbriti në fushë si zëvëndësues. Ndërsa goli i fundit për Barçën u shënua në minutat e fundit shtesë nga francezi Ousmane Dembele.
Fitorja do të thotë se ekipi i Xavi kryeson momentalisht La Liga-n me 13 pikë. Katalanasit kanë shënuar 15 gola deri më tani në kampionat, dhe kanë pësuar vetëm 1. Progresi në repartin e mbrojtjes është mëse i qartë, teksa tekniku Xavi po implementon dalëngadalë modelin e tij të lojës. Real Madrid ndërkohë ka 12 pikë në vendin e dytë, por galaktikët kanë një ndeshje më shumë. Të besuarit e trajnerit Ancelotti do të luajnë ditën e diel përballë Mallorca.