Kur Joan Laporta fitoi zgjedhjet për president të Barcelonës pak muaj më parë, u bë e qartë se Ronald Koeman nuk bënte pjesë në planet e tij afatgjata. Presidenti i ri i katalanasve duket se kishte idenë e tij për të ringritur dhe një herë Barcelonën, në majat më të larta të futbollit europian. Por tashmë, Barcelona po përballet me një realitet tjetër.
Koeman është ende trajner, dhe Laporta ka lënë të kuptohet disa herë se është shumë pranë rinovimit të kontratës me 1 vit tjetër për hollandezin. Por në të njejtën kohë, mediat aludojnë për mosmarrëveshje dhe pakënaqësi mes të dyve. Pra çfarë po ndodh në të vërtetë në klubin katalanats?
Problemet financiare të klubit luajnë rol kyç për të kuptuar më mirë situatën. Barcelona ndodhet zyrtarisht në një pikë shumë të vështirë përsa i përket të ardhurave, teksa klubi përballet me borxhe që kapin shifrën e aluduar prej 1.6 miliardë dollarëve. Në qoftë se Laporta dëshiron të ndërpresë në mënyrë të menjëhershme bashkëpunimin me Koeman, duhet të paguajë kostot e prishjes së kontratës përpara përfundimit të saj, në mënyrë të njëanshme.
Ndërkohë tensionet u shtuan akoma më shumë mes Koeman dhe Laporta, kur ky i fundit i kërkoi hollandezit 14 ditë kohë, për të vendosur nëse do të vazhdonte apo jo bashkëpunimi me të. Kjo ndodhi para startit të sezonit dhe agjenti i Koeman, Rob Jansen e komentoi në mënyrë ironike:
“Imagjinoni për një moment: Unë dua të martohem me ty, por kam dyshime. Më jep 2 javë kohë për të gjetur një partner më të mirë. Nëse nuk gjej partnerin e duhur, do të martohemi gjithsesi!”
E gjithë kjo situate po dëmton Barcelonën, teksa bordi ende mësohet se është duke kërkuar alternativa për stolin e klubit. Bisedimet me Julian Nagelsmann kanë dështuar teksa, gjermani preferoi stolin e Bayern Munich, ndërsa Roberto Martinez i Belgjikës është ende një opsion.
