Trajneri i Leicester City, Brendan Rodgers, është zotuar të luftojë për vendin e trajnerit të “Dhelprave”, pavarësisht rezultateve të fundit dhe ecurisë negative të skuadrës. Leicester gjendet momentalisht në vendin e fundit në renditjen e Premier League. Ekipi ka siguruar vetëm 1 pikë në 7 ndeshjet hapëse, dhe takimi i fundit përballë Tottenham u mbyll me shifrat 6-2 në favor të këtyre të fundit.
Pavarësisht rezultatit, Leicester luftoi fort ndaj Tottenham, dhe diferenca nuk ishte aq e madhe mes skuadrave, të paktën përsa i përket konfidencës në fushën e blertë. Këtë gjë e ka vënë në dukje dhe vet Rodgers, i cili për BBC Sport foli për situatën e vështirë që po kalon klubi. Tekniku komentoi:
“Unë gjithmonë mendoj se mund ta kapërcejmë këtë situatë. Sot nuk patë një ekip që i mungonte vetëbesimi në fushë, dhe kjo është gjithmonë një shenjë e mirë. Do të luftoj gjithmonë, por e kuptoj lojën dhe 6 humbje rresht nuk janë mirë për askënd.”
Ndërkohë në një tjetër intervistë, Brendan Rodgers deklaroi:
“Çfarëdo që të ndodhë, gjithmonë do të kem një respekt të madh për ata (drejtuesit e klubit) sepse më kanë dhënë shumë suport. E kuptoj sesi funksionon futbolli. Çfarëdo që ndodh me mua tek Leicester, gjithmonë do të kem respekt për ta.”
Mesfushori James Maddison gjithashtu foli për mediat pas humbjes me Tottenham, duke mbrojtur trajnerin Rodgers dhe duke vendosur një pjesë të përgjegjësisë tek lojtarët. Maddison u shpreh:
“Njerëzit shikojnë rezultatin 6-2 dhe mendojnë se Leicester u shkatërrua sërisht, por nuk mendoj se është kështu. Në pjesën e parë ndjeva se ne ishim Leicester-i që ne njohim, ekipi i Brendan Rodgers që bën presing të lartë dhe krijon shanse… Lojtarët duhet të marrin një pjesë të përgjegjësisë. Është kolektive, nuk e ka fajin vetëm trajneri, ne jemi 11-shja në fushë. Është e dhimbshme kur vërtet ke respekt për trajnerin, përfundimisht ne jemi lojtarët dhe së fundmi nuk kemi luajtur si duhet.”
