Ashtu si dhe pritej, Leo Messi është shpallur për të tetën herë në karrierën e tij, fitues i trofeut më prestigjoz individual në futboll, Topit të Artë. Argjentinasi triumfoi me kombëtaren e tij në botërorin e Katarit vitin që lamë pas, dhe pikërisht ky sukses ishte dhe arsyeja kryesore e kurorëzimit të tij për të tetën herë si fitues.
I dyti në rradhë në renditjen zyrtare për trofeun prestigjoz ishte bomberi i Manchester City, Erling Haaland. Sulmuesi norvegjez arriti të fitojë tripletën në sezonin e tij të parë me “qytetarët” në Angli. Megjithatë, duket se suksesi i Haaland nuk ishte i mjaftueshëm për të eklipsuar triumfin e Messi me Argjentinën në Katar. Lojtari që tashmë aktivizohet me Inter Miami në MLS u shpreh për fitoren:
“Të jesh këtu përsëri dhe të shijosh këtë moment është një ndjesi e mirë. Fitova botërorin dhe realizova ëndrrën time. Nuk mund ta imagjinoja asnjëherë që do të kisha këtë karrierë dhe do të arrija gjithçka që kam arritur. Kam patur fatin të jem pjesë e ekipit më të mirë në histori.”
Ndërkohë Haaland gjithashtu është shprehur për sukseset e tij gjatë sezonit të kaluar. Gjatë mbrëmjes gala në Paris, bomberi tha:
“Dua të falenderoj Manchester City. Të gjithë klubin. Gjithashtu dua të falenderoj familjen time dhe njerëzit e afërt, pasi më kanë bërë ai që jam sot.”
Mes çmimeve të tjera që u ndanë në ceremoninë e rëndësishme, ishte ai i portierit më të mirë që u fitua nga Emiliano Martinez, portieri i Argjentinës në botëror dhe Aston Villa në Premier League. Klubi më i mirë për vitin e kaluar u shpall Manchester City, ndërkohë që talenti i Real Madrid, Jude Bellingham, u shpall fitues i trofeut Kopa, për lojtarin më të mirë në botë nën 21 vjeç.