Ditën e diel, mediat britanike publikuan lajmin e bujshëm se superstari i PSG, Lionel Messi, ishte shumë afër një lëvizjeje drejt Inter Miami sezonin e ardhshëm. Sipas portaleve sportive, Messi do të firmoste me ekipin e MLS pas përfundimit të Kupës së Botës.
Gjithsesi, përfaqësuesit e argjentinasit kanë hedhur poshtë lajmin, duke cilësuar raportimet si lajme false. Një nga përfaqësuesit e sulmuesit, Marcelo Mendez, ka komentuar lajmin e bujshëm për CNN duke thënë:
“Është një gënjeshtër, janë lajme false. Nuk ka negociata mes Lionel dhe Inter Miami për t’iu bashkuar atyre sezonin e ardhshëm.”
Kapiteni i kombëtares argjentinase ndodhet në Katar duke përfaqësuar kombëtaren e tij, në atë që me shumë mundësi do të jetë Kupa e Botës e fundit për ish-lojtarin e Barcelonës. Në të njejtën kohë, Messi po luan sezonin e fundit të parashikuar në kontratën e tij me PSG. Kjo ngre akoma më shumë pikëpyetje mbi lëvizjen e rradhës së argjentinasit.
“Pleshti” shënoi një gol fantastik në sfidën përballë Meksikës, duke udhëhequr Argjentinën drejt një fitoreje mjaft të rëndësishme 2-0. Pas humbjes shokuese përballë Arabisë Saudite në ndeshjen e parë të fazës në grupe, Argjentina ka zgjuar përsëri shpresat e kualifikimit në fazën e ardhshme.
Kujtojmë se Leo Messi nuk ka arritur asnjëherë të ngrejë lart Kupën e Botës, pavarësisht se ka triumfuar me Argjentinën në Copa America. Sulmuesi ka fituar plot 40 trofe në karrierën e tij, në rang klubi dhe kombëtareje.
Ndërkohë raportimet e mediave sportive bëjnë me dije se përveç Leo Messi, Inter Miami është gjithashtu i interesuar në shërbimet e Fàbregas dhe Suárez. Klubi në të cilin është bashkë-pronar dhe David Beckham kërkon të ndërtojë një organikë kualitative lojtarësh, duke rritur kështu dhe nivelin e përgjithshëm të kampionatit amerikan të futbollit, Major League Soccer.