Në një konferencë për shtyp mjaft emocionuese, ylli i Barcelonës, Lionel Messi u shfaq për herë të parë përpara mediave, pas konfirmimit të largimit të tij nga klubi spanjoll. Me lot në sy argjentinasi sqaroi te gjithë situatën që çoi drejt largimit të tij nga Camp Nou, si dhe hodhi dritë mbi thashethemet në lidhje me të ardhmen e tij.
Messi i dha fund 21 viteve qëndrim te klubi katalanas, pasi këta të fundit nuk mund të respektonin kushtet financiare të kontratës së rënë dakord me futbollistin. Arsyeja ishte limitet e reja financiare të vendosura nga La Liga. Vet Leo deklaroi:
“Familja dhe unë ishim të bindur që do të qëndronim këtu, në shtëpi. Ky është fundi me këtë klub dhe tani do të fillojë një histori e re. Ky është një nga momentet më të vështira për mua. Nuk dua që ta lë këtë klub, është një skuadër që e dua dhe një moment që nuk e prisja. Vitin e kaluar doja të largohesha, këtë vit doja të qëndroja. Prandaj jam kaq i mërzitur.”
Ditët e fundit është konfirmuar se babai i argjentinasit, është duke biseduar me PSG për një transferim të mundshëm të numrit 10 në Paris. Francezët duket se janë më pranë se të gjithë për të marrë shërbimet e Leos, dhe lojtari komentoi mbi këto zhvillime:
“Është një mundësi, por nuk kam rënë dakord me asnjë ekip. Ka klube të ndryshme që janë të interesuara. Asgjë nuk është përfundimtare, por jemi në bisedime me ta.”
Leo u shpreh mirënjohës ndaj fansave dhe të gjithë personave që e kthyen eksperiencën e tij në Camp Nou në të paharrueshme. Argjentinasi gjithashtu shprehu dëshirën për t’u rikthyer përsëri në Spanjë në të ardhmen:
“Nuk kam dyshim se pas disa vitesh, do të rikthehemi këtu pasi është shtëpia jonë.”