Pas dëmtimit të rëndë që mori në sfidën ndaj Leeds, mesfushori i Liverpool, Harvey Elliot, i është nënshtruar operacionit, dhe fatmirësisht lajmet janë pozitive. Sipas deklaratës zyrtare të “The Reds” lojtari mund të jetë përsëri i disponueshëm për trajnerin Klopp, në një moment më të vonë të sezonit. Mjeku i klubit, Jim Moxo ndau me mediat:
“Operacioni ishte i suksesshëm dhe tani nis periudha e rikuperimit. Nuk do të vendosim presion mbi të, duke përcaktuar një datë fikse se kur mund të jetë gati. Por, mund të themi me konfidencë se presim që Elliot të jetë gati në një moment të dytë gjatë sezonit, pasi të ketë ndjekur programin rehabilitues.”
Futbollisti, i cili është vetëm 18 vjeç, u transportua me barrelë jashtë fushës së blertë, pasi pësoi një dëmtim serioz në kyçin e këmbës së majtë. Shkak u bë përplasja me mbrojtësin kundërshtar Pascal Struijk. Liverpool arriti të fitonte takimin përballë Leeds në shifrat 3-0, por shumica e lojtarëve nuk e kaluan lehtë dëmtimin e rëndë të shokut të skuadrës. Portieri Alisson deklaroi:
“Ajo që ndodhi me Harvey më mërziti. Është diçka e vështirë për t’u përballur kur je në fushë. Të gjithë lojtarët e tjerë kanë një rol të rëndësishëm për t’i dhënë atij support, duhet të bëjmë më të mirën tonë gjatë kësaj kohe.”
Gjithsesi Elliott duket se nuk ka hatërmbetje ndaj mbrojtësit Struijk për atë që ndodhi. Lojtari deklaroi:
“Nuk ishte faji i tij. Dhe nuk ishte as karton i kuq, ishte e gjitha një aksident i tmerrshëm, por këto gjëra ndodhin në futboll. Do të kthehem më i fortë. Faleminderit për suportin.”
Në një postim më të ri në Instagram, mesfushori i “The Reds” konfirmoi se operacioni kishte shkuar si duhet, dhe tani është në rrugën drejt rikueperimit.
