Niko Kovac ka dalë në skenë si një nga emrat surprizë që mund të zëvëndësojë Jurgen Klopp në krye të pankinës së Liverpool. Klopp ka bërë të ditur tashmë se do të largohet në fund të sezonit, dhe shumë alternativa kanë qarkulluar në media përsa i përket zëvëndësuesit të tij në Anfield.
Ish-tekniku i Bayern Munich dhe Monaco është tashmë i lirë, pasi u shkëput nga drejtimi i Wolfsburg para pak kohësh. Liverpool ende nuk ka kontaktuar zyrtarisht asnjë prej emrave potencialë për të zëvëndësuar Klopp, teksa drejtuesit e klubit janë ende në fazën e mbledhjes së informacionit, për të analizuar opsionet që kanë në dispozicion.
Për momentin, emri më i lakuar është ai i Ruben Amorim, trajneri aktual i Sporting Lisbon. Megjithatë, pavarësisht lajmeve të shumta për të, portugezi ka bërë të ditur se nuk ka diskutuar asgjë për momentin me Liverpool, dhe nuk ka asnjë akord mes palëve.
Ndërkohë përsa i përket Kovac, mësohet se përfaqësues të trajnerit ndodhen në Londër për të diskutuar me klube të ndryshme të Premier League, të cilat janë në kërkim për një trajner të ri këtë merkato vere.
Kovac fitoi kupën e Gjermanisë me Eintracht Frankfurt në vitin 2018, përpara se të fitonte përsëri kupën dhe kampionatin me Bayern Munich një vit më vonë. Më pas Kovac u vendos në krye të pankinës te Monaco në Francë për dy sezone, nga 2020 deri në 2022. Megjithatë, aventura e tij tek Wolfsburg në Bundesliga nuk shkoi si duhet dhe Kovac u largua në mars nga klubi.
Mbetet të shohim nëse teknikut kroat do t’i jepet mundësia për të menaxhuar për herë të parë një ekip në Premier League. Përvec Liverpool, klube të tjera në Premier League gjithashtu janë duke konsideruar Kovac si kandidat për pankinën e tyre.
