Trajneri i Liverpool, Jurgen Klopp, ka thënë se të jesh në krye të pankinës së “The Reds”, nuk vlen vetëm në “kohëra me diell”. Gjermani hodhi poshtë opinionet e mediave se ekipi i tij është në rënie, dhe u zotua se do të luftojë deri në fund për të rikthyer Liverpool në formën e tij më të mirë.
Anglezët janë kuaifikuar në fazën me eleminim direkt të Champions League dhe do të luajnë përballë Napoli ditën e martë, në takimin përmbyllës të fazës në grupe. Megjithatë, të besuarit e Klopp kanë vuajtur shumë në Premier League këtë sezon. Ekipi ka fituar vetëm 4 nga 12 takimet e para, dhe ndodhet momentalisht në vendin e 9 në renditjen e përgjithshme. Klopp komentoi mbi situatën:
“Nuk është diçka që rregulloht lehtë, por nuk do të ndalojmë së luftuari. Njerëzit më shohin mua dhe thonë se dukem i lodhur, por nuk jam. Nuk mund të përdor atë justifikim. Puna ime këtu nuk është vetëm kur dielli shkëlqen dhe dikush po na jep një trofe. Detyra ime është të jem këtu edhe kur kalojmë periudha shumë të vështira, dhe do ta bëj këtë me gjithë forcën time.”
Klopp gjithashtu sqaroi se një pjesë e madhe e situatës së vështirë të Liverpool, është dhe për shkak të dëmtimeve:
“Mendoj se gjykimi për këtë ekip duhet të vijë më vonë, ose mbase në fund të sezonit. Nëse thua se ‘ky ishte fundi’ për këtë grup lojtarësh dhe trajnerin nuk mendoj se është 100% e drejtë në këtë moment, pasi nuk i kemi pasur ata (lojtarët) të disponueshëm. Na mungojnë lojtarë, sidomos në sulm, na mungon kualiteti dhe kjo gjë nuk na ndihmon. Edhe pse nuk është e drejtë, është okay… Këto janë pyetje që është e drejtë të bëhen, por duhet t’u përgjigjemi më vonë.”