Trajneri i Liverpool, Jurgen Klopp, u shpreh i pakënaqur me disa vendime të arbitrit Mike Dean, në sfidën kundër Burnley që ekipi i tij fitoi me rezultatin 2-0. Gjermani është i mendimit se zyrtarët e Premier League duhet të ndryshojnë disa rregulla të lojës, për të mbrojtur lojtarët gjatë ndërhyrjeve të gabuara që ndodhin gjatë ndeshjeve.
Përpara startit të sezonit të ri të Premier League, sipas rregullores së re, arbitrat janë këshilluar që të mos ndalojnë lojën për ndërhyrje që nuk konsiderohen “serioze”. Megjithatë, përkufizimi lë shumë hapësira për interpretim dhe nuk është i qartë.
Në takimin përballë Burnley, arbitri Mike Dean nuk akordoi asnjë karton të verdhë. Kjo, pavarësisht faktit se lojtarët e Burnley shkaktuan plot 12 ndërhyrje të gabuara në dëm të “The Reds”. Faullet e shkaktuara nga Ashley Barnes dhe Chris Wood duket se kanë frustruar Klopp, i cili deklaroi për mediat:
“Nëse ju pëlqen ajo gjë shikoni mundje. Ne gjithmonë duhet të jemi gati për një “luftë” të vërtetë, ashtu siç ishim dhe sot. Ju i patë përplasjet e Barnes dhe Wood me Virgil dhe Joel Matip. Nuk jam 100% i sigurtë nëse arbitrat janë duke marrë vendimin e duhur. Më duket sikur po kthehemi 10-15 vite prapa. Rregullat janë ashtu siç janë, por nuk mund ta mbrosh një gjë të tillë.”
Gjermani gjithashtu shtoi:
“Më pëlqejnë vendimet që favorizojnë skuadrën sulmuese, jam në rregull me këtë gjë. Por, duhet të mbrojmë lojtarët tanë. Nuk mund ta anashkalojmë këtë. Në shumë momente luajtëm një lojë brilante, edhe pa shënuar gol. Në momente të tjera na duhej të luftonim jashtëzakonisht shumë. Fituam dhe asnjeri nuk u dëmtua.”
Ndërkohë nga ana tjetër, trajneri i Burnley, Sean Dyche, tha se i pëlqejnë rregullat e reja të Premier League. Pavarësisht kësaj, Dyche kishte kontradiktat e tij në lidhje me vendimet e Mike Dean, të cilat në disa raste i konsideroi të padrejta, duke thënë se favorizuan “The Reds”.