Trajneri i Liverpool, Jurgen Klopp, ka pranuar dhe një herë situatën e vështirë në të cilën gjendet klubi këtë sezon, duke theksuar nevojën për ndryshime në merkaton e verës. “The Reds” u mposhtën 5-2 nga Real Madrid në Champions League dhe eleminimi në ndeshjen e rradhës duket i pashmangshëm. Në kampionat situata gjithashtu është larg pritshmërive, teksa Liverpool mban vendin e 8 në renditjen e përgjithshme të Premier League.
Klopp komentoi situatën:
“E dimë se duhet të përmirësohemi dhe të ndryshojmë shumë gjëra, dhe do ta bëjmë. Nuk mund ta bëjmë tani, por është e qartë që duhet të bëjmë diçka në verë. Për momentin duhet ta kalojmë situatën duke luftuar…Një nga arsyet kryesore që firmosa kontratën e re ishte sepse e dija që do të kishte një periudhë tranzicioni.”
Tekniku gjerman gjithashtu vuri në dukje diferencat mes Liverpool dhe klubeve të tjera, përsa i përket aspektit të menaxhimit:
“Ky klub nuk drejtohet duke hedhur para gjithandej. Transferimet tona duhet të jenë gjithmonë të goditura. Kjo e komplikon situatën. Nuk mund të bëjmë 4 transferime pa ditur fillimisht se kush do të largohet dhe gjëra të tilla. Viti i kaluar nuk ishte një sezon për ndryshime të mëdha. Luajtëm deri në momentin e fundit, dhe nëse duhet të ndryshojmë diçka në këtë klub, nuk mund ta bëjmë duke sjellë lojtarë, dhe më vonë të kuptojmë se askush nuk do të largohet. Nuk funksionon kështu.”
Klopp shtoi:
“Duhet të bëjmë planet tona dhe kjo është ajo që ne bëjmë, por bazuar në mënyrën sesi ky klub drejtohet. Qartësisht është ndryshe nga klubet e tjera. Ka funksionuar deri tani dhe duhet të shohim nëse do të funksionojë përsëri, apo duhet të përshtatemi.”
Pavarësisht rezultateve zhgënjyese të këtij sezoni, duket se trajneri gjerman gëzon ende besimin e drejtuesëve të klubit.