Liverpool është gati të lërë Mohamed Salah të largohet këtë merkato vere, nëse oferta e duhur “troket” në derën e “The Reds”. Drejtuesit e klubit anglez janë të gatshëm të heqin dorë nga Salah për një ofertë që i përafrohet shumës prej 60 milionë paundësh. Ky është lajmi që ka bërë me dije The Sun, ku sipas prestigjozes angleze, Real Madrid është klubi që po monitoron më nga afër situatën delikate.
Salah mund të largohet po njësoj si Mane, i cili iu bashkua Bayern Munich për shumën e 35 milionë paundëve. Senegalezi kishte vetëm 1 vit kontratë të mbetur me Liverpool dhe klubi anglez vendosi të arkëtojë të ardhurat nga kartoni i tij, duke mos rrezikuar kështu largimin me kosto zero në fund të vitit të ardhshëm. Situata e Salah është e njejtë, teksa egjiptiani ka dhe 1 vitë kontratë aktive me klubin.
Bisedimet për një rinovim të mundshëm janë kthyer prej 1 viti tashmë në një telenovelë të vërtetë, teksa problem kryesor mbeten pretendimet e Salah për pagën e tij. Mësohet se ylli egjiptian ndihet i nënvlerësuar tek Liverpool, duke marrë parasysh kontributin e tij në formën e ekipit. Për këtë arsye, Salah kërkon një pagë javore prej 400 mijë paundësh.
Klubi ndërkohë padyshim që kërkon të mbajë Salah në Anfield, por trajneri Klopp dhe drejtuesit sportivë nuk janë të gatshëm të prishin strukturën e pagave të ekipit. Sulmuesi përfiton momentalisht rreth 240 mijë paundë në javë, pak a shumë në të njejtin nivel me Virgil van Dijk. Egjiptiani ka deklaruar disa herë se nuk dëshiron “shuma të çmendura parash” për të qëndruar.
Në rastin e largimit, Salah do ta ketë mjaft të vështirë të shkojë tek një tjetër klub në Premier League, duke qënë se drejtuesit e Liverpool, sipas të gjitha gjasave nuk do t’i shesin rivalëve, lojtarin e tyre më të çmuar. Kjo është dhe arsyeja se përse Real Madrid duket opsioni më i përshtatshëm për sulmuesin, nëse ai dhe klubi nuk gjejnë gjuhën e përbashkët.
