E ardhmja e Liverpool është e paqartë, teksa sipas mediave angleze, pronarët e “The Reds” po kërkojnë për aksionerë të rinj, dhe një pjesë e klubit është në shitje. Prestigjozja “The Athletic” raportoi se pronarët aktualë të Liverpool, Fenway Sports Group, kanë hapur dyert për oferta potenciale për pronësinë e ekipit. FSG bleu klubin në vitin 2010 për 300 milionë paundë, ndërkohë që shitja e tij në këtë moment mund të gjenerojë mbi 4 miliardë paundë.
Kompania amerikane u shpreh se mbetet ende 100% e fokusuar në “suksesin e Liverpool brenda dhe jashtë fushe”, por nuk mohoi lajmin për hapjen e ofertave. Në 12 vitet e klubit nën drejtimin e FSG, “The Reds” kanë arritur të fitojnë 8 trofe, 6 prej të cilëve nën drejtimin e trajnerit Jurgen Klopp.
Mbi situatën ka komentuar dhe asistenti i Jurgen Klopp, Pep Lijnders. Ky i fundit u shpreh:
“Nuk është asgjë e re për një klub që të kërkojë investitorë të rinj. Të gjithë ata që na kanë parë në vitet e fundit, të gjithë ata që na njohin si klub, e dinë se ne kemi një marrëdhënie të ngushtë me pronarët. Ne kemi informacion mbi lajmin po aq sa keni dhe ju (mediat). Pronarët gjithmonë veprojnë në interesin më të mirë të klubit.”
Lijnders shtoi:
“Për mua, ata janë pronarë të mirë, dhe do t’ju shpjegoj disa arsye. E para, ata arritën të mbajnë në klub për 7 vite plus, një nga trajnerët më të mirë në botë. E dyta, arritën të mbajnë lojtarët më të mirë në ekip. Dhe ajo që është më e rëndësishme, kemi një akademi stabël… Ata kanë marrë vendime mjaft të mira. Kemi fituar shumë kupa dhe çmime ndërkombëtare.”
Ndërkohë, një pjesë e madhe e fansave të klubit kanë kërkuar që drejtuesit e Liverpool të konsultohen me ta, për çdo vendim që ka të bëjë me të ardhmen e klubit.
