Löw largohet pas Euro 2021, ja pasardhësi i mundshëm

Joachim Löw do të largohet nga posti i trajnerit të përfaqësueses gjermane, pas përfundimit të Euro 2020. Lajmi është zyrtar dhe është bërë i ditur për publikun nga Federata Gjermane e Futbollit (DFB). Trajneri gjerman do t’i japë kështu fund aventurës së tij 15 vjeçare, mjaft të suksesshme në drejtimin e “panzerave”.

Faktikisht kontrata e Löw skadon në vitin 2022, në përfundim të Kupës së Botës. Por, trajneri ka kërkuar një shkëputje të parakohshme për të cilën është arritur akordi mes tij dhe federates. Numri 1 i pankinës së gjermanëve u shpreh për mediat:

“Po e ndërmarr këtë hap me vetëdije të plotë, me krenari dhe mirënjohje të jashtëzakonshme. Por, në të njejtën kohë vazhdoj të mbetem mjaft i motivuar përsa i përket Europianit të këtij viti. E them me krenari sepse kam pasur fatin dhe kam qënë i nderuar të punoj me futbollistët tanë më të mirë për gati 17 vite rresht, dhe t’i suportoj ata në zhvillimin e tyre.”

Joachim Löw u shpreh më tej:

“Kam përjetuar triumfe të mëdha, por dhe disfata të hidhura, por mbi të gjitha momente të magjishme dhe fantastike. Dhe nuk e kam fjalën vetëm për fitoren e Kupës së Botës 2014.”

Tani që kapitulli Löw është shumë afër mbylljes për Gjermaninë, e gjithë vëmendja është tek zëvëndësuesi i tij i mundshëm. Mes të tjerëve, emri i Jürgen Klopp, trajnerit të Liverpool është ai më i lakuari nga mediat. Megjithatë, vetëm pak kohë më parë ishte vet Klopp që e përjashtoi si mundësi stolin e kombëtares gjermane. Gjithsesi numri 1 i pankinës së Liverpool i tha “Jo” një oferte të mundshme në verë, por mendimi i tij mund të ndryshojë më vonë, nuk dihet. Sidomos tani që Liverpool duket se me të gjitha gjasat është në fund të një cikli mjaft të suksesshëm.