Manchester City i Pep Guardiolës ka vendosur një rekord të ri në Premier League duke ofruar plot 100 milionë paundë, për të marrë shërbimet e Jack Grealish. Mesfushori anglez duket se është ndër objektivat kryesorë të trajnerit spanjoll këtë merkato. Sipas raportimeve të BBC, ka pasur një komunikim aktiv mes klubeve, dhe “qytetarët” po kërkojnë të mbyllin marrëveshjen, përpara se Grealish të rikthehet te Aston Villa nga pushimet.
Në qoftë se transferimi bëhet një realitet, kjo do të linte pas 89 milionë paundët që Manchester United pagoi për shërbimet e Paul Pogba në vitin 2016. Shuma e lartë tregon dhe dëshirën e madhe të Pep për të patur në ekip mesfushorin. Kryesisht, aftësitë e tij në mbajtjen e topit e kthyen lojtarin në të preferuarin e fansave gjatë Euro 2020.
Gjithsesi, një transferim i mundshëm i Grealish, me shumë mundësi do të thotë që City do të heqë dorë nga gara për të marrë shërbimet e Harry Kane. Kjo pasi kartoni i lojtarit është gjithashtu mjaft i shtrenjtë, dhe konkurrenca nga klubet e tjera europiane është më e ashpër.
Ndërkohë nga Spanja ende vijojnë lajmet interesante në lidhje me transferimin e mundshëm të Kylian Mbappe te Real Madrid. Madrilenët janë në prag të startit të bisedimeve me ekipin francez, dhe rrethanat duket se janë në favorin e tyre.
Kjo pasi kontrata e supestarit francez skadon në vitin 2022, dhe nëse PSG nuk është në gjendje të rinovojë, ai do të largohet me parametra zero nga klubi. Gjithashtu, Real Madrid mund të vijë në tavolinë me një ofertë më të mire financiare. Largimet e Sergio Ramos dhe Raphael Varane kanë mbushur arkat e klubit dhe Florentino Perez mund të finalizojë më në fund ëndrrën e tij. Paul Pogba, shoku i skuadrës së Mbappe te kombëtarja franceze është gjithashtu nën radaring e gjigandëve spanjollë.