Mesfushori i talentuar i Manchester City, Bernardo Sliva, ka bërë një deklaratë që mund të ketë mërzitur një pjesë të madhe të tifozerisë së klubit anglez. Portugezi ka pranuar dëshirën për t’iu bashkuar dhe një herë ish-klubit të tij të vjetër, Benficas. Silva ka thënë se i mungon vendi i tij i lindjes dhe dëshiron të jetë më pranë familjes dhe klubit të futbollit ku është rritur.
Verën e vitit të kaluar mesfushori u përfol për një largim të mundshëm nga Etihad, por kjo gjë nuk ndodhi. Ai jo vetëm që qëndroi në Manchester, por konsolidoi pozitat e tij si një nga lojtarët më të rëndësishëm në ekipin e Pep Guardiolës. Megjithatë, kjo gjë nuk e ka ndaluar Bernardo Silvën të flasë për planet e së ardhmes. Ai u shpreh për Channel 11:
“Më mungon shumë Portugalia. Nëse do të kisha mundësinë që të kthehesha pas 1 ose 2 vitesh atje do ta bëja. Jo vetëm pasi dua të luaj përsëri për Benfican, por gjithashtu sepse më mungon familja ime dhe jetesa në Portugali.”
Silva ka pranuar dhe më parë lidhjen e tij të veçantë me klubin. Futbollisti ka thënë:
“Benfica është një pjesë e rëndësishme e jetës time. Unë jam rritur duke parë ndeshjet e Benficas me babain dhe shokët e mi. Përveç kësaj, kam luajtur me këtë ekip nga mosha 12 vjeçare deri 19 vjeç, pra pak a shumë gjysma e jetës time. Kur u largova isha gati 20 vjeç dhe ishte një vendim i vështirë për t’u marrë. Por rezultoi se lëvizja te Monaco ishte gjëja e duhur.”
Pep Guardiola nuk është trajner që mban lojtarë pa dëshirën e tyre në klub, dhe nëse portugezi vendos përfundimisht të largohet nga Manchester City, ka shumë gjasa të shohim një rikthim të mesfushorit tek Benfica.
