Manchester City do t’i hapë rrugën largimit të Kalvin Phillips në formën e huazimit, muajin e ardhshëm. Mediat angleze kanë bërë të ditur se trajneri Guardiola nuk do të pengojë anglezin të largohet merkaton e ardhshme, duke qënë se shancet e tij për të luajtur futboll rregullisht tek “qytetarët” janë gati zero. Por cili do të jetë klubi ku mesfushori do të luajë si i huazuar duke nisur nga janari?
Të gjitha indikacionet të drejtojnë tek Newcastle, që kanë kohë që interesohen për lojtarin. Klubi i trajnerit Howe duhet të zëvëndësojë mungesën e Sandro Tonali në mesfushë, teksa ky i fundit është i pezulluar deri në fund të sezonit. Megjithatë, Newcastle nuk ka fondet e duhura që të vijë me një ofertë për të blerë përfundimisht kartonin e Kalvin Phillips. Kjo më së shumti për shkak të rregullave të fair play-it financiar. Edhe transferimi në formë huazimi do të ketë sfidat e veta, dhe këtë e konfirmoi vet trajneri Howe. Kur u pyet për transferimin e mundshëm të Phillips, tekniku tha se palët janë ende shumë larg arritjes së një marrëveshjeje.
Përpara disa ditësh, u raportua gjithashtu se Juventus kishte nisur bisedimet me City, për transferimin e mesfushorit anglez. Por ky i fundit nuk dëshiron një largim nga Premier League, e për këtë arsye, Newcastle duket i vetmi opsion i mbetur për Phillips.
Kalvin ka luajtur vetëm 89 minuta këtë sezon në Premier League, ndërkohë që dhe sezonin që lamë pas, situata ishte e njejtë. Mesfushori kërkon me këmbëngulje të sigurojë vendin e tij në formacionin titullar të kombëtares angleze, në europianin e vitit të ardhshëm. Kjo ka qënë dhe arsyeja se përse Kalvin ka këmbëngulur për t’u larguar nga City që në janar. Anglezi e di mjaft mirë se pa luajtur futboll të rregullt, shancet që ai të jetë pjesë e skuadrës së Gareth Southgate janë mjaft të vogla.
