Bomberi i Manchester City, Erling Haaland, është në dyshim për sfidën e rëndësishme të “qytetarëve” përballë Arsenal këtë javë. Sulmuesi u dëmtua në fitoren 3-1 të City përballë Aston Villa, dhe u detyrua të linte fushën në pushimin mes pjesëve. Trajneri i skuadrës, Pep Guardiola, konfirmoi lajmin duke komentuar situatën për mediat:
“Erling mori një goditje, ai nuk po ndihej mirë. Në pushimin mes pjesëve fola me doktorët. Ata thanë se me rezultatin që ishim në atë moment, ishte më mirë të mos rrezikonim dhe këtë bëmë. Në qoftë se rezultati do të ishte më i ngushtë mbase nuk do ta kisha bërë (zëvëndësuar Haaland). Shpresojmë të jetë gati për të mërkurën. Por nëse nuk është apo ka risk, ai nuk do të luajë.”
Arsenal ndërkohë barazoi 1-1 me Brentford ditën e shtunë dhe ky është rasti perfekt për të besuarit e Pep Guardiolës që të ngushtojnë distancën me londinezët. Nëse City ia del të fitojë në Emirates do të kalojë në krye të renditjes, por Arsenal ka një ndeshje ekstra për të luajtur. Guardiola shtoi:
“Skuadra që është sipër nesh në renditje humbi pikë, kjo ishte dhe arsyeja se përse ishte e rëndësishme të shfrytëzonim mundësinë dhe të ngushtonim diferencën. Ata kanë luajtur një ndeshje më pak, ne e dimë diferencën në pikë dhe llogarisim se jemi 6 pikë prapa, por do të udhëtojmë në Londër për të luajtur lojën tonë.”
Guardiola beson se ekipi i tij është përmirësuar në javët e fundit, dhe ka shanse reale për të mposhtur rivalët e Arsenal:
“Ndiej se jemi përmirësuar shumë, sidomos në seancat stërvitore të 10 ditëve të fundit. Të gjithë janë të fokusuar, gjë që na jep shansin të jemi kompetitivë. Nuk na siguron fitoren, por pa focus ajo është e pamundur.”
