Cristiano Ronaldo do të mbajë veshur të njejtën fanellë ikonike me numrin 7, dhe kësaj rradhe me Manchester United. Portugezi, i cili së fundmi theu rekordin e futbollistit me më shumë gola në arenën ndërkombëtare (111), do të marrë numrin nga Edinson Cavani. Uruguajani që mbante deri më tani fanellën me numrin 7 te United, sipas raportimeve ka pranuar në mënyrë vullnetare të ndërrojë numrin që mban veshur.
Ronaldo ndërkohë, duket se e ka vlerësuar shumë këtë gjest. Ish lojtari i Juventus dhe Real Madrid u shpreh:
“Nuk isha i sigurt nëse do të ishte e mundur të mbaja veshur përsëri, fanellën me numrin 7. Për këtë arsye, dua të falenderoj Edin [Cavani] për këtë gjest të jashtëzakonshëm.”
Ronaldo komentoi më tej në lidhje me transferimin e tij, në klubin prestigjoz anglez:
“Kam një histori fantastike me këtë klub. Isha këtu në moshën 18 vjeçare dhe jam shumë i lumtur të rikthehem përsëri në shtëpi pas 12 vitesh. Mendoj se është vendimi më i mirë që kam marrë. Është i duhuri. Erdha nga Juve drejt Manchester dhe ky është një kapitull i ri, jam shumë i gëzuar dhe dua të vazhdoj përsëri, të bëj histori, të ndihmoj United të arrijë rezultate të mira, të fitojë trofe…”
Ronaldo nuk do të jetë i disponueshëm për Portugalinë në sfidën përballë Azerbaijan ditën e martë. Shkak është bërë kartoni i verdhë që sulmuesi mori kur festoi golin e tij në minutën shtesë përballë Republikës së Irlandës. Duke qenë se veterani ishte ndëshkuar me karton të verdhë më përpara në fushatën e kualifikueseve, nuk do të jetë pjesë e formacionit të Fernando Santos.
Pavarësisht kësaj, ende mbetet e paqartë se në çfarë date sulmuesi do t’i bashkohet “Djajëve të Kuq” për të bërë debutimin e tij të dytë me anglezët.