Drejtuesit e Manchester United janë më të interesuar për të sjellë në krye të pankinës së klubit, Thomas Frank, sesa teknikun e kombëtares angleze, Gareth Southgate. Ky është lajmi që kanë bërë të ditur mediat angleze, teksa duket se Erik ten Hag mund të largohet nga Old Trafford në fund të sezonit.
Përpara disa ditësh qarkulloi për herë të parë lajmi se Gareth Southgate mund të jetë trajneri i ri i United duke nisur nga sezoni i ardhshëm. Megjithatë, anglezi nuk gëzon mbështetjen e të gjithë anëtarëve të bordit drejtues të klubit. Në fakt, sipas zhvillimeve të fundit, është trajneri i Brentford, Thomas Frank, ai që po konsiderohet më seriozisht nga ana e Manchester United për të marrë drejtimin e pankinës.
Frank ka 6 vite që është nën drejtimin e Brentford dhe ka impresionuar me punën e tij me “bletët”. Sezonin e kaluar tekniku ia doli të ngjisë klubin nga Championship në Premier League, elitën e futbollit anglez. Brentford gjendet momentalisht në vendin e 15 në renditjen e përgjithshme në kampionat. Stili ofensiv i lojës që Frank aplikon është mjaft atraktiv jo vetëm për tifozët e Brentford, por dhe për shumë fansa nga ekipet rivale në Premier League. I vetmi disavantazh i Thomas mund të konsiderohet fakti se trajneri nuk ka eksperiencë në menaxhimin e klubeve të mëdha apo lojtarëve të mëdhenj.
Ndërkohë, në një skenar ideal, drejtuesit e Manchester United do të donin të sillnin në Old Trafford trajnerin e Real Madrid, Carlo Ancelotti. Në bordin e “Djajëve të Kuq” italiani ka shumë adhurues, por ai shihet si një objektiv i parealizueshëm. Sidomos duke marrë parasysh faktin se vet Ancelotti është shprehur se ndihet mjaft i lumtur në Madrid, dhe nuk dëshiron të largohet nga Bernabeu në të ardhmen.
