Pavarësisht rezultateve zhgënjyese që duket se nuk kanë fund, trajneri i Manchester United, Erik ten Hag, është shprehur se ka ende besim tek lojtarët e tij. Sipas teknikut hollandez, lojtarët janë të vendosur të luftojnë për të kaluar këtë moment të vështirë në historinë e klubit. Kujtojmë se “Djajtë e Kuq” u eleminuan nga Carabao Cup pas humbjes 3-0 ndaj Newcastle, ndërkohë që nuk kanë bindur me rezultatet e tyre, as në Premier League apo Europë.
Në një intervistë për shtyp, Ten Hag ka komentuar mbi situatën:
“Ata (lojtarët) duan ta rregullojnë këtë situatë. Ne i njohim standartet këtu dhe duhet të luftojmë për to çdo ditë. Do të vazhdojmë të luftojmë. Lojtarët janë të fortë, trajnerët janë të fortë, ky trajner është i fortë.”
Ndërkohë së fundmi, në mediat angleze kanë qarkulluar fjalë se mes lojtarëve të United ekzistojnë konflikte dhe mosmarrëveshje. Megjithatë, Ten Hag i ka hedhur poshtë këto pretendime, duke iu referuar fitores me përmbysje të United ndaj Brentford, si një provë e unitetit në ekipin e tij. Hollandezi shtoi:
“Kujtoni betejën që bëmë ndaj Brentford dhe përmbysjen e rezultatit. Nëse nuk do të kishte shpirt luftarak në dhomat e zhveshjes nuk do t’ia kishim dalë.”
Trajneri i United gjithashtu konfirmoi lajmin e keq se Casemiro i është shtuar listës së gjatë të dëmtimeve që “Djajtë e Kuq” po vuajnë. Braziliani do të jetë jashtë fushave të blerta për disa javë për shkak të një dëmtimi të marrë në në humbjen ndaj Newcastle. Gjithsesi, Ten Hag nuk ka dashur të justifikojë paraqitjet e ekipit me dëmtimet e shumta, duke thënë se United duhet të fitojë dhe nuk duhet të ketë justifikime.
Hollandezi pranoi përgjegjësinë e tij dhe tha se nuk po mendon për merkaton e janarit, pasi është i bindur në kualitetin e skuadrës së tij.
