Erik ten Hag kërkon të sjellë Hakim Ziyech në Old Trafford. Tekniku i Manchester United ka piketuar asin e Chelsea, si një nga objektivat kryesorë në javët e fundit të merkatos verore. Megjithatë, hollandezi po përballet me rezistencën e drejtuesëve të United, të cilët nuk janë dakord me transferimin e Ziyech tek “Djajtë e Kuq”.
Tekniku i United ka identifikuar 29 vjeçarin si një alternativë tjetër për krahun e majtë të sulmit. Anglezët ishin të interesuar për talentin e Ajax, Antony, por bisedimet mes hollandezëve dhe drejtuesëve të United u ndalën për shkak të pretendimeve financiare të Ajax. Këta të fundit kërkojnë rreth 80 milionë euro për kartonin e Ajax.
Ziyech ndërkohë ka një kontratë aktive me Chelsea deri në vitin 2025. Lojtari u aktivizua në ndeshjen e parë të këtij sezoni, që Chelsea arriti të fitojë ndaj Everton. Pavarësisht faktit se bordi i United ka mbështetur vazhdimisht Ten Hag në dëshirat e tij, duket se rasti i Ziyech përbën një përjashtim, teksa arsyet janë ende të paqarta.
Situata e merkatos duket gjithnjë e më e dëshpëruar tek United, teksa klubi dështoi të afronte Timo Werner pas 11 orësh bisedime me përfaqësuesit e Chelsea. Sulmuesi gjerman vendosi të rikthehej tek klubi i tij i vjetër, RB Leipzig.
Një tjetër dështim i United në këtë merkato vere lidhet me Benjamin Sesko. Sulmuesi i Red Bull Salzburg vendosi t’i bashkohet Leipzig, vetëm 3 javë pasi agjenti i tij pati një takim me drejtorin sportiv të “Djajëve të Kuq”, John Murtough.
Të besuarit e trajnerit Ten Hag u mposhtën 4-0 nga Brentford në transfertë, në ndeshjen e dytë të sezonit në Premier League. Kriza sa vjen e thellohet për United, që e sheh veten në fundin e kategorisë, teksa përballja e rradhës është ajo me gjigandët e Liverpool.