Drejtuesit e Manchester United po planifikojnë të nisin bisedimet me Benfica, për të sjellë në Old Trafford talentin Joao Neves. Mesfushori i cili është vetëm 19 vjec ka siguruar tashmë vendin e titullarit në klubin e tij, dhe ka rënë në sy me paraqitjet mjaft bindëse në fushën e blertë. Neves është aktivizuar gjithsej në 27 takime në të gjitha kompeticionet këtë sezon, ndërkohë që ka debutuar dhe me kombëtaren e Portugalisë në kualifikueset e Euro 2024.
Transferimi i Neves në Old Trafford do të jetë një mision mjaft i vështirë, dhe United i ka paraprirë situatës duke nisur që tani bisedimet për një marrëveshje të mundshme në verë. Vlera e kartonit të mesfushorit përllogaritet në shumën e mbi 100 milionë paundëve, teksa Neves konsiderohet si një nga talentet më premtuese në Europë.
Miliarderi anglez, Sir Jim Ratcliffe, i cili bleu 25% të aksioneve të Manchester United, është i vendosur të përmirësojë procesin e rekrutimit tek “Djajtë e Kuq”, duke sjellë emra më kualitativë në ekip. Neves konsiderohet një prej prioriteteve kryesore, teksa lojtari zotëron kualitetin për të iniciuar aksione mjaft të rrezikshme nga prapavija. Konkurrenca për shërbimet e mesfushorit do të jetë e madhe, ndërkohë që trajneri i Benfica, Roger Schmidt, ka bërë të qartë se asnjë lojtar nuk do të largohet në merkaton e janarit. Schmidt u shpreh:
“Jemi në mes të sezonit dhe kemi objektiva të mëdha. Sigurisht që nuk do të lëmë asnjë prej këtyre lojtarëve të largohet. Na nevojiten dhe askush nuk dëshiron të largohet, kështu që nuk ka vend për pyetje.”
Neves ka një kontratë aktive me Benfica deri në vitin 2028, dhe kjo e vështirëson akoma më shumë arritjen e një marrëveshjeje. Megjithatë, duket se drejtuesit e United janë të gatshëm të jenë të duruar në objektivin e tyre.