Lojtarët e Manchester United janë të idesë se Erik ten Hag nuk do të jetë më në krye të pankinës në sezonin e ardhshëm. Lajmi është bërë i ditur nga mediat angleze teksa lojtarët e “Djajëve të Kuq” kanë vënë re një ndryshim në sjelljen e teknikut hollandez. Kjo erdhi pasi Sir Jim Ratcliffe, një nga pronarët e klubit, refuzoi të konfirmonte se Ten Hag do të jetë në Old Trafford dhe sezonin e ardhshëm.
Vet trajneri u shpreh i sigurt mbi të ardhmen e tij, duke konfirmuar ndërkohë se nuk ka dyshime se do të jetë pjesë e United dhe sezonin e ri. Erik ten Hag u shpreh:
“Nuk kam dyshime. Jam i sigurt se jemi në drejtimin e duhur dhe do të shkojmë atje ku duam.”
Megjithatë, duket se bordi drejtues i klubit ka marrë tashmë një vendim tjetër. Hollandezi pritet të zëvëndësohet nga Graham Potter, teksa ky i fundit ka patur një takim me Jim Ratcliffe. Ish-trajneri i Chelsea refuzoi një ofertë për të marrë drejtimin e Ajax javën e kaluar, dhe mendohet se anglezi po pret për konfirmimin e tij si trajner i Manchester United duke nisur nga sezoni i ardhshëm. Potter gjithashtu ka refuzuar ofertën e Lyon në Francë, si dhe atë të kombëtares suedeze. Burime të afërta pranë anglezit gjithashtu kanë konfirmuar dëshirën e tij për t’u rikthyer në Premier League.
Teoria e rikthimit të Potter gjithashtu mbështetet nga fakti se trajneri ka punuar së bashku me Dan Ashworth, drejtorin e ri sportiv të United, gjatë kohës kur Potter ishte nën drejtimin e Brighton. Ndërkohë, Gareth Southgate dhe Roberto De Zerbi janë ende në tavolinë si emra potencialë për postin e trajnerit. Megjithatë, Graham Potter duket më afër pankinës së Old Trafford në këto momente.
