Drejtuesit e Manchester United janë gati të heqin dorë prej disa nga veteranëve në kampin e “Djajëve të Kuq”, në përpjekje për të grumbulluar fonde dhe për të sjellë lojtarë të rinj në ekip. Trajneri Erik ten Hag kërkon përforcime të reja në merkaton e verës, dhe klubi e ka të nevojshëm krijimin e hapësirave. Sipas prestigjozes angleze Mirror, janë plot 6 titullarë në ekipin e parë që mund të largohen në fund të sezonit.
Mes tyre bëjnë pjesë Harry Maguire, Anthony Martial dhe Scott McTominay. Së bashku me ta mund të largohen dhe të huazuarit Alex Telles dhe Eric Bailly, si dhe mesfushori hollandez Donny van de Beek. E gjitha është pjesë e planit të Erik ten Hag, i cili që në fillim të aventurës së tij në Old Trafford, i bëri të qartë drejtuesëve të klubit se i nevojiten minimalisht 2 apo 3 merkato vere, për të ekzekutuar vizionin e tij dhe për t’i sjellë United trofe madhorë.
Më specifikisht, tekniku hollandez është në kërkim të një sulmuesi, një mesfushori dhe një qendër-mbrojtësi, me shpresën se këta të fundit mund të luajnë në Champions League sezonin e ardhshëm. Kjo do të thotë se sipas të gjitha gjasave Harry Maguire nuk është më në planet e Ten Hag, dhe kjo është vënë re edhe në javët e fundit. Trajneri preferon dyshen Varane – Martinez e cila ka performuar mjaft mirë në prapavijë.
Ndërkohë përsa i përket sulmit, francezi Martial asnjëherë nuk ia ka dalë të jetë konsistent në paraqitjet e tij, dhe largimi i tij nga ekipi mund të jetë shumë më i lehtë nëse United thërret Mason Greenwood përsëri në skuadër. Në mesfushë, McTominay gjithashtu e ka humbur betejën e titullarit, teksa ardhja e Casemiro and Christian Eriksen ka rezultuar mjaft efektive në lojë dhe rezultate për “Djajtë e Kuq”.
Megjithatë, asgjë nuk është definitive, teksa United është ende në garë në shumë kompeticione, dhe lojtarët kanë ende kohë për të provuar vlerat e tyre në fushën e blertë.