Drejtuesit e Manchester United mund të shesin Jadon Sancho dhe Donny van de Beek për vetëm 26 milionë paundë gjithsej. Ky është lajmi shokues që kanë bërë të ditur mediat angleze, teksa drejtuesit e “Djajëve të Kuq” janë duke konsideruar mënyrën më të shpejtë për të “hequr qafe” lojtarët nga Old Trafford. Dhe duket se të dy lojtarët mund të përfundojnë tek Juventus në Itali.
Sancho kritikoi hapur trajnerin Ten Hag para disa muajsh, lëvizje që duket se i kushtoi karrierën e tij në Manchester. Sulmuesi u përjashtua prej ekipit dhe është tashmë e qartë se nuk ka më asnjë mënyrë për t’u kthyer përsëri në skuadrën e parë. Megjithatë, problemet me karakterin duket se nuk janë dhe aq të rëndësishme për drejtuesit e Juventus, të cilët janë të gatshëm të sjellin sulmuesin në Torino.
Ndërkohë, përsa i përket hollandezit Van de Beek, “Zonja e Vjetër” gjithashtu ka parë një mundësi për ta përfshirë dhe atë në ekip. Donny erdhi në Old Trafford në vitin 2020 nga Ajax, por dështoi të kishte impaktin e pritur prej tij në Premier League. Shkak ishin dhe dëmtimet e njëpasnjëshme që ia bënë mesfushorit mjaft të vështirë të gjente konsistencën në një kampionat tepër fizik.
Van de Beek është aktivizuar vetëm 21 minuta këtë sezon dhe ka pranuar dhe vet dëshirën për të nisur një kapitull të ri në karrierën e tij, që në merkaton e janarit.
Teksa ekipet rivale të Premier League nuk janë të interesuara për Sancho apo De Beek, duket se Juventus është gati të hidhet në sulm muajin e ardhshëm për të dy futbollistët. Juventus ka nevojë për përforcime në mesfushë, duke marrë parasysh mungesën e Paul Pogba, dhe Donny van de Beek duket një opsion solid, ashtu si dhe Sancho për sulmin.