Lojtarët e Manchester United kërkojnë nga drejtuesit e klubit, që të sjellin në krye të pankinës së Old Trafford trajnerin aktual të PSG, Mauricio Pochettino. Sipas raportimeve të Express, disa nga figurat më me peshë në bordin e United kanë nisur të ndërtojnë një strategji për këtë objektiv, pasi dhe ata e pëlqejnë idenë e argjentinasit në krye të “Djajëve të Kuq”.
Por trajneri i përkohshëm, Ralf Rangnick, është një fans i Erik Ten Hag të Ajax. Opinioni i gjermanit do të jetë mjaft me peshë në rekrutimin e teknikut të ardhshëm të United, por bordi është treguar i kujdesshëm për të dëgjuar dhe lojtarët.
Drejtori i ri ekzekutiv, Richard Arnold, i cili zëvëndësoi Ed Woodward muajin e kaluar, është i ndërgjegjshëm se anglezët duhet të lëvizin shpejt nëse duan të sjellin një emër me peshë në krye të pankinës së Old Trafford. Dhe Pochettino, i cili është nën presion te PSG e ka bërë të qartë se i pëlqen ideja e rikthimit në Premier League.
PSG dhe Pochettino do të përballen me një sfidë mjaft të vështirë në Champions League javën tjetër, teksa shorti i ka vënë përballë spanjollëve të Real Madrid. Shumë gjëra do të varen nga ecuria e parizienëve në Champions League, pasi ky është i vetmi trofe që presidenti Nasser Al-Khelaifi ka kërkuar nga çdo trajner, që ka qënë në krye të PSG në vitet e fundit. Nëse francezët dështojnë përsëri në kompeticionin elitar largimi i Pochettino duket i pashmangshëm, pavarësisht nëse United bën apo jo një lëvizje për të.
Ten Hag gjithashtu mbetet një nga alternativat kryesore për stolin e anglezëve, teksa Rangnick është një fans i teknikut hollandez. Ajax është në rrugën e duhur për të fituar titullin e tretë kampion nën drejtimin e trajnerit, dhe Ten Hag duket se është gati për aventurën e tij të rradhës.