Mbrojtësi i Manchester United, Lisandro Martinez, pritet të jetë jashtë fushave për një periudhë 2-3 mujore. Lajmi është bërë i ditur nga vet Manchester United nëpërmjet një deklarate zyrtare. Mbrojtësi argjentinas është një nga lojtarët e rëndësishëm në Old Trafford, dhe trajneri Ten Hag duhet të vrasë mendjen tashmë për një tjetër mungesë në fushën e blertë. Kujtojmë se Martinez gjithashtu humbi fundin e sezonit të kaluar për shkak të një dëmtimi.
Në deklaratën zyrtare, United u shpreh se Martinez u dëmtua fillimisht në sfidën ndaj Arsenal para disa javësh. Mbrojtësi tashmë do të qëndrojë jashtë fushave për shkak të agravimit të dëmtimit. Stafi i klubit u shpreh:
“Tashmë është përcaktuar se ai (Martinez) ka nevojë për një periudhë jashtë fushës për t’u rikuperuar dhe rehabilituar. Analizat po vazhdojnë për të përcaktuar se cili do të jetë hapi i rradhës.”
Trajneri Ten Hag gjithashtu komentoi mbi dëmtimin e Martinez duke shprehur keqardhjen e tij:
“Kjo është situatë për të ardhur keq, për atë dhe për ekipin, pasi nuk ishte 100% në kondicionin më të mirë fizik. Mendoj se kishte një diferencë të madhe mes Martinez që kemi parë në ndeshjet e fundit dhe Martinez që pamë sezonin e kaluar.”
Mbrojtësi argjentinas u aktivizua në ndeshjet përballë Wolves, Tottenham, Nottingham Forest, si dhe Arsenal. Lojtari nuk u aktivizua në fitoret e United ndaj Burnley dhe Crystal Palace. Martinez iu bashkua United vitin e kaluar nga skuadra e Ajax për shifrën e 57 milionë paundëve. Mbrojtësi ishte mjaft i rëndësishëm në suksesin e United në Carabao Cup sezonin që lamë pas, si dhe renditjen e tyre në vendin e tretë në Premier League.
Mbetet të shohim se cilat do të jenë skemat e reja të Ten Hag në repartin difensiv, tashmë që opsionet janë akoma më të kufizuara.
