Manchester United është gati të pranojë oferta për kartonin e Raphael Varane gjatë merkatos së janarit. Kontrata e mbrojtësit francez me “Djajtë e Kuq” skadon në fund të këtij sezoni, ndërsa klubi ka opsionin për të rinovuar kontratën e tij me 1 vit ekstra. Momentalisht Varane mund të diskutojë me klube të tjera, lidhur me një transferim potencial me kosto zero në fund të sezonit. Kjo është pikërisht një nga arsyet që ka vënë në lëvizje drejtuesit e United, të cilët nuk duan të humbasin Varane pa përfituar nga shitja e tij.
4 herë fituesi i Champions League me Real Madrid ka tërhequr vëmendjen e disa klubeve europiane, por dhe klubeve të Arabisë Saudite. Mes opsioneve më interesante është dhe Bayern Munich, që sipas mediave angleze do të bëjë një ofertë zyrtare në janar. Bavarezët kanë nevojë për opsione në mbrojtje pasi Kim Min-Jae duhet të largohet për të luajtur në kupën e Azisë, ndërkohë që Noussair Mazraoui gjithashtu do të largohet në janar për të luajtur me kombëtaren e Marokut në African Cup of Nations.
Varane ndërkohë e ka humbur vendin e titullarit në skuadrën e trajnerit Ten Hag. Kjo jo vetëm për shkak të zgjedhjeve të trajnerit hollandez, por dhe për shkak të dëmtimeve. Mbrojtësi francez nuk ka patur fat këtë sezon, dhe si pasojë ka luajtur gjithsej vetëm 520 minuta në Premier League.
Varane është aktivizuar në sfidat e rëndësishme ndaj Liverpool dhe Aston Villa, dhe impakti i tij për United ka qënë pozitiv. Megjithatë, me rikthimin e Maguire, Martinez dhe Lindelof nga dëmtimet respektive, Varane sipas të gjitha gjasave do të jetë përsëri në stol. Trajneri Ten Hag nuk ka komentuar ende mbi largimet e mundshme në merkaton e janarit, por duket se ky muaj do të jetë mjaft aktiv në Old Trafford.
