Mbrojtësi i talentuar i Manchester United, Raphael Varane, la fushën me lot në sy, në barazimin 1-1 që “Djajtë e Kuq” regjistruan përballë Chelsea. Shkak u bë një dëmtim që francezi mori, në përpjekje për të rrëmbyer topin nga Pierre-Emerick Aubameyang. Varane u zëvëndësua Victor Lindelof, dhe tani e gjithë vëmendja është nëse ish-mbrojtësi i Real Madrid do t’ia dalë të luajë në Kupën e Botës, që është më pak se 1 muaj larg.
“Duhet të presim 24 orë dhe më pas do të kuptojmë se çfarë dëmtimi është. E kuptoj reagimin e tij (Varane), mund ta kuptojmë të gjithë se ai do të jetë emotiv, por i duhet të presë, ende nuk e dimë…Ai ka eksperiencë por mjekët duhet të bëjnë punën e tyre, të bëjnë një ekzaminim, të përcaktojnë diagnozën e duhur, dhe më pas të arrijmë në një konkluzion.”
Karriera e Varane në Premier League është karakterizuar nga dëmtimet, që prej momentit kur mbrojtësi la Real Madrid për t’iu bashkuar “Djajëve të Kuq”. Francezi refuzoi të largohej me barrelë jashtë fushe pasi mori dëmtimin, por nga reagimi i tij u pa qartë se gjendja ishte serioze.
Ndërkohë përsa i përket takimit Casemiro ia doli të rrëmbente një pikë për United në minutat e fundit, duke vendosur baraspeshën në fushë pas penalltisë së Jorginho. Barazimi ishte padyshim i merituar për United, që krijoi shanse gjatë gjithë takimit, duke regjistruar 13 goditje gjithsej, 6 prej të cilave në kuadrat. Rezultati do të thotë se të besuarit e trajnerit Ten Hag gjenden vetëm 1 pikë prapa Chelsea në renditjen e përgjithshme, dhe gara për një vend në “top 4” është më e ashpër se kurrë.