Manchester United duket se ka gjetur një rrugë alternative që mbajë Cristiano Ronaldon në ekip, pa shkaktuar pakënaqësi te portuezi. 37 vjeçari është pranë një transferimi tek Atletico Madrid, por “Djajtë e Kuq” ende nuk janë të gatshëm të heqin dorë prej tij. Për këtë arsye, drejtuesit e United kanë ardhur me një propozim konkret që ka surprizuar sulmuesin.
Anglezët janë të gatshëm të lënë CR7 të largohet, vetëm në formën e huazimit. Kushti i United është që Ronaldo duhet të aktivizojë opsionin e rinovimit që parashikohet në kontratën e tij me klubin, duke firmosur dhe për një vit tjetër me ekipin e Ten Hag. Kjo do të thotë se pas këtij sezoni si i huazuar, ai mund të kthehet sezonin e ardhshëm për të luajtur dhe një herë tjetër me “Djajtë e Kuq”.
Ten Hag është shpresëplotë se pas këtij sezoni, ekipi do të luajë në Champions League, dhe kjo do të jetë mjaftueshëm për të bindur Ronaldo që të rikthehet pas huazimit. Disa figura të rëndësishme të klubit ende janë skeptikë në lidhje me sezonin e parë të trajnerit hollandez në krye të ekipit, por shpresat për një vend në 4 më të mirët e Premier League janë të larta.
Sipas prestigjozes Mirror në Angli, propozimi i klubit ka surprizuar CR7 së bashku me agjentin e tij Jorge Mendes. Megjithatë, dyshja nuk e ka hedhur poshtë alternativën e klubit. Drejtuesit e United e dinë mirë ndërkohë se në qoftë se portugezi është jo i lumtur, kjo do të sillte probleme të mëdha për Erik ten Hag. Dhe nuk bëhet fjalë vetëm për performancën e skuadrës në fushë. Tekniku po punon fort për të krijuar një harmoni më të mirë në dhomat e zhveshjes, pas problemeve të vazhdueshme që ndodhën në sezonin që lamë pas.
