Në 5 paraqitje me Manchester United këtë sezon, Ronaldo nuk ka realizuar asnjë gol të vetëm apo asist. Situata është e pazakontë për portugezin, por gjithçka bën sens duke marrë parasysh rrethanat dhe krisjen e sulmuesit me klubin. Pavarësisht dëshirës për t’u larguar, CR7 do të luajë të paktën deri në janar në Old Trafford. Por si përkthehet kjo për të ardhmen e Ronaldo, dhe a do të gjejë sulmuesi hapësira në formacionin bazë të Erik ten Hag?
Në fitoren 1-0 përballë Leicester City 37 vjeçari e nisi ndeshjen nga stoli, duke u aktivizuar vetëm në 22 minutat e fundit. Trajneri Ten Hag u pyet nga gazetarët nëse Ronaldo ishte nga lojtarët e parë të klasit të tij që lihej në stol në rolin e zëvëndësuesit. Tekniku hollandez tha se është ende shumë herët, dhe lojtarët e stolit mund të aktivizohen në javët e ardhshme.
Por si do të përshtatet CR7 me modulin e lojës që Ten Hag kërkon?
Problemi i parë është fakti se Ronaldo është ende i pakënaqur me shumë lojtarë të klubit, duke qënë se portugezi pretendon se një numër i madh prej tyre nuk kanë ambicien e duhur për të fituar trofe me “Djajtë e Kuq”. Kjo gjë e bën të vështirë përfshirjen e sulmuesit në ekip si një “team player”, sidomos duke marrë parasysh faktin se Ten Hag preferon një stil loje me presing sa më të lartë në fushë.
Nëse Ronaldo aktivizohet në këtë modul loje, gjasat janë që superstari do të shërbehet më pak nga shokët e tij të skuadrës, dhe do t’i duhet të punojë më shumë për të gjetur rrugën e rrjetës. Por mosha nuk është në favorin e portugezit. Skenari më i mundshëm është ai ku portugezi aktivizohet në mënyrë të kufizuar si titullar, në ndeshjet e Europa League, apo në kampionat. Më pas në varësi të performancës, Ten Hag do të vendosë nëse do t’i japë Ronaldos më shumë minuta në fushë.
