Sir Jim Ratcliffe ka zgjedhur Gareth Southgate si alternativën e parë në listë, për të zëvëndësuar Erik ten Hag, në krye të pankinës së Manchester United në verë. Kontrata e Southgate me kombëtaren angleze të futbollit skadon në dhjetor, dhe Federata Angleze po bën maksimumin e vet për të bindur Gareth që të rinovojë kontratën.
Megjithatë, Southgate e ka bërë të qartë se nuk do të vendosë asgjë mbi të ardhmen e tij, deri në përfundim të europianit të këtij viti në Gjermani. Sipas mediave angleze, Ratcliffe së bashku me anëtarë të tjerë të bordit të United, janë konsultuar së fundmi me disa prej legjendave të klubit mbi personin e duhur për të zëvëndësuar Erik ten Hag. Përgjigja mbizotëruese ishte emri i Southgate.
Trajneri aktual i kombëtares angleze ka gjithashtu mbështetjen e disa prej lojtarëve të United, si dhe drejtorit të ri sportiv që pritet të vijë në klub, Dan Ashworth. Ky i fundit ka një raport pozitiv me Southgate edhe nga fakti se kanë punuar prej kohësh së bashku në Federatën Angleze të Futbollit.
Në rast se Gareth bindet për të pranuar rolin e trajnerit tek Manchester United, “Djajtë e Kuq” duhet të mendojnë dhe për prishjen e kontratës me Erik ten Hag. Në rast se hollandezi shkarkohet nga klubi, ai mund të përfitojë rreth 10 milionë paundë për prishjen e parakohshme të kontratës, një shumë e konsiderueshme.
Megjithatë, duket se Ratcliffe nuk është i bindur në aftësitë e Ten Hag, dhe potencialin e tij për t’i besuar ringritjen e klubit në një projekt afatgjatë. Kjo do të thotë se nëse bordi drejtues bindet për alternativën e Southgate, dhe anglezi gjithashtu pranon propozimin e klubit, sipas të gjitha gjasave sezoni i ri do të nisë me një trajner të ri në Old Trafford.