Mbrojtësi i Manchester United, Raphael Varane, do të jetë jashtë fushave të blerta për disa javë për shkak të një dëmtimi. Francezi u detyrua të linte fushën në sfidën ndaj Nottingham Forest në pushimin mes pjesëve, përballje që “Djajtë e Kuq” e fituan me rezultatin 3-2 me përmbysje.
Klubi ka hedhur poshtë zërat se Varane mund të mungojë për 6 javë, duke thënë se pushimi i ndeshjeve kombëtare do t’i ofrojë Varane një mundësi më shumë për t’u rikuperuar. Rrjedhimisht mbrojtësi do të humbasë më pak ndeshje me Manchester United. Ndërkohë, mungesa e tij ka ngritur dhe një herë tjetër pikëpyetjet mbi fatin e Harry Maguire në klub.
Prej kohësh anglezi është përfolur për një lëvizje drejt West Ham, pavarësisht se ky i fundit refuzoi një ofertë të klubit përpara disa ditësh. Zërat brenda United thonë se mundësia që Maguire të largohet në ditët e fundit të merkatos është ende e vlefshme, por dëmtimi i Varane mund të detyrojë trajnerin Ten Hag që të ndalë këtë lëvizje. Tekniku hollandez ka nevojë për sa më shumë opsione në qendër të mbrojtjes, duke marrë parasysh dhe axhendën e ngjeshur të United, që luan në disa kompeticione.
Situata e dëmtimit të Varane gjithashtu mund të ndryshojë qëndrimin e klubit në lidhje me mbrojtësin Jonny Evans. Momentalisht lojtari ka një kontratë të përkohshme me United, por ajo mund të kthehet në një kontratë të plotë, duke parë nevojën e “Djajëve të Kuq” për përforcime në mbrojtje.
Sfida e rradhës për United në Premier League është ajo ndaj Arsenal. Përballja do të jetë mjaft e vështirë, duke marrë parasysh kualtietin e ekipit të Mikel Artetës. Londinezët u ndalën në barazim 2-2 ndaj Fulham në sfidën e kaluar dhe do të kërkojnë të kthehen tek fitorja në kampionat.
