Roberto Mancini është i mendimit se Italia u ka provuar tashmë të gjithë skeptikëve të kundërtën, duke u kualifikuar në finalen e Euro 2020. Pas një sfide tejet të lodhshme përballë Spanjës, e cila u vendos vetëm pas goditjes së penalltive, trajneri i italianëve u shpreh për mediat:
“Gati askush nuk besonte se do t’ia dilnim, por ja ku jemi në finale. Ka lojëra ku duhet të vuash. Nuk mund të shkojnë të gjitha aq qetë, si progresi ynë deri më tani. E dinim se do të ishte një lojë e vështirë. Kjo është arsyeja se përse lojtarët dhe të gjithë ata që kanë punuar pranë nesh, në 3 vitet e fundit kanë meritën e tyre. Nuk ishte e lehtë.”
Mancini gjithashtu bëri një analizë të shkurtër të lojës:
“Përsa i përket kontrollit të topit Spanja është ekipi më i mirë. Ata na shkaktuan probleme dhe duhet të krijonim shance për shënim atje ku kishim mundësi. Donim të arrinim finalen dhe u përpoqëm deri në fund. Penalltitë janë një llotari, por i heq kapelen Spanjës, janë një ekip i mrekullueshëm.”
Ndërkohë nga kampi spanjoll, Luis Enrique u duk i qetë pas përballjes dhe tha se nuk kishte ankesa mbi lojën e ekipit të tij:
“Nuk është një natë e trishtueshme për mua, aspak. Sigurisht, ka pak dëshpërim, por ky është futbolli elitar. Duhet të mësohesh me humbjet dhe fitoret. Kemi treguar se jemi një skuadër. Tani është koha për t’u rikuperuar dhe do të shihemi sërish në kualifikueset e Botërorit.”
Në mënyrë të veçantë, Enrique komplimentoi mesfushorin Pedri. Sipas trajnerit spanjoll, 18 vjeçari është një lojtar shumë i formuar për moshën e tij:
“Asnjë 18 vjeçar nuk ka bërë atë që po bën ai. Performancat, interpretimi i lojës, mënyra sesi gjen hapësira të lira, karakteri i tij… është e jashtëzakonshme.”