Italia e Roberto Mancinit prodhoi një nga rezultatet më të papritura në kualifikueset e Botërorit të Katarit. “Azzurrit” u ndalën në një barazim pa gola nga Irlanda e Veriut, duke humbur kështu shancin për një kualifikim direkt në Kupën e Botës. Kjo pasi rivalët e tyre direkt në grup, Zvicra, fituan 4-0 përballë Bullgarisë duke siguruar vendin e parë në grup.
Por rezultati nuk e ka demotivuar aspak trajnerin Mancini, pavarësisht se prestigjozja “Gazzetta dello Sport” e cilësoi rezultatin si apokaliptik. Numri 1 i pankinës së italianëve deklaroi pas takimit:
“Do të kualifikohemi në Kupën e Botës në Mars, dhe mbase do ta fitojmë atë. Kam shumë besim. Pavarësisht se po kontrollojmë mirë lojën, kemi vështirësi për të gjetur rrugën e rrjetës. Kësaj rradhe duhej të shënonim shpejt… Është për të ardhur keq pasi duhej t’i kishim mbyllur gjërat shumë më shpejt në këtë grup.”
Mancini shtoi:
“Duhej të kishim fituar përballë Bullgarisë, ndërsa ndaj Zvicrës na u dhanë 2 penallti. Këto janë lojëra që mund të kishin përfunduar në favorin tonë. Jam shumë konfident për playoff-et.”
James Horncastle, ekspert i futbollit italian pranë BBC Sport, dhe një arsye interesante se përse kombëtarja italiane është përballur me vështirësi në këto kualifikuese. Horncastle tha:
“Kalendari i ndeshjeve është një nga faktorët se përse Italia ka vuajtur në takimet e fundit. Sapo fituan Europianin, ata duhej të luanin përsëri në kualifikueset e Botërorit. Italia luajti në playoff-et e vitit 2017 përballë Suedisë, në një ndeshje ku të gjithë ishin të bindur se italianët do të kualifikoheshin. Por presioni rezultoi i tepërt për ta. Dhe ja ku jemi përsëri, ata rrezikojnë të mos kualifikohen në një tjetër Botëror. Mungesa e lojtarëve si Spinazzola, Verratti, Chiellini dhe Immobile është gjithashtu një nga arsyet e barazimit.”