Shefi ekzekutiv i Inter, Giuseppe Marotta, ka konfirmuar për mediat se klubi italian është në bisedime me Romelu Lukaku dhe Paulo Dybala, për një transferim të mundshëm të yjeve në San Siro. BBC Sport ka konfirmuar se Lukaku është i gatshëm të pranojë një pagë më të ulët, për t’u ribashkuar me ekipin e tij të vjetër. Dybala ndërkohë thuhet se po mendon seriozisht një lëvizje drejt zikaltërve.
Marotta u shpreh për Radio Rai:
“Lukaku dhe Dybala janë objektivat tanë. Por duhet të marrim parasysh dhe faktorin financiar. Jemi në bisedime me këta dy lojtarë dhe do të ishim të lumtur nëse do të arrinim një marrëveshje. Nëse jo do të marrim në konsideratë alternativa të tjera.”
Marotta gjithashtu konfirmoi se Inter ka arritur të sigurojë shërbimet e Henrikh Mkhitaryan të Romës, dhe portierit Andre Onana të Ajax.
Në lidhje me transferimin e Lukaku, presidenti i Inter, Steven Zhang, është duke planifikuar një strategji për të përballuar shpenzimet financiare të klubit për transferimin e belgut. Zhang është duke zhvilluar takime me trajnerin Simone Inzaghi për të rënë dakord mbi një propozim që dhe Chelsea mund ta shohë si të pranueshëm. Situata e Dybala ndërkohë është shumë më e thjeshtë. Argjentinasit i skadon kontrata në fund të këtij muaji dhe do të largohet me kosto zero nga Juventus. Kërkesat e tij për pagën gjithashtu janë më të ulta se ato të Lukaku.
Marotta ndërkohë u shpreh se Inter është vazhdimisht në ndjekje të talenteve potenciale. Italiani tha:
“Po vlerësojmë pak nga të gjithë, edhe lojtarë nga ekipet e të rinjëve që u shpallën kampionë me Italinë. Ne e dimë se duhet të presim për lojtarë të rinj dhe të ndërtojmë një ekip të fortë.”
Sezonin që lamë pas Inter humbi kampionatin me vetëm 2 pikë diferencë nga Milan, që u shpall kampion.