Përpjekja e Roman Abramovich për të shitur aksionet e klubit të Chelsea është ndalur nga qeveria angleze. Pas rrezikut të sanksioneve të mundshme ndaj tij, si pasojë e masave të marra kundër oligarkëve rusë, presidenti i Chelsea mori vendimin për të nxjerrë në shitje klubin londinez. Por autoritetet britanike kanë “ngrirë” asetet e Abramovich, duke përfshirë klubin e futbollit.
Kjo vendos Chelsea në një udhëkryq shumë delikat, pasi qëllimi i autoriteteve është që të ndalin Abramovich nga përfitimi i të ardhurave monetare, nga ekipi. Qeveria ka vënë në zbatim një plan special sipas të cilit stafi dhe futbollistët do të vazhdojnë të paguhen rregullisht, të paktën deri në fund të sezonit. Gjithashtu, abonimi që kanë blerë tifozët për të ndjekur live ndeshjet e Chelsea gjatë këtij sezoni do të vazhdojë të jetë i vlefshëm.
Por e ardhmja pritet të jetë mjaft e vështirë. Chelsea nuk do të jetë në gjendje të shesë apo të blejë lojtarë të rinj. Gjithashtu, dyqani zyrtar i klubit do të mbyllet. Qeveria angleze po mendon dhe një tjetër masë speciale, që është përpunimi i një license që lejon shitjen e klubit në të ardhmen, por me kusht që Abramovich mos të fitojë asnjë të ardhur nga operacioni.
Të gjitha këto masa do t’i japin një goditje të madhe Chelsea, që do ta ketë shumë të vështirë të jetë konkurrues në kampionat dhe Europë, nëse masat do të vazhdojnë të mbeten në fuqi për një kohë të gjatë.
Abramovich u shpreh pak ditë më parë se paratë e përfituara nga shitja e klubit do të shkonin në ndihmë të viktimave të luftës. Por mesa duket kjo nuk do të ndodhë pasi bilioneri rus e ka humbur de-fakto pronësinë e Chelsea. Analistë sportivë të BBC Sport, por dhe tifozë të ekipit janë shprehur pensimistë për të ardhmen e ekipit, duke thënë se i pret përpara një rrugë e vështirë.
